Por E.P. | Santiago de Compostela | 25/01/2019 | Actualizada ás 14:00
O conselleiro de Economía, Emprego e Industria, Francisco Conde, reclamou ao Goberno central unha transición ecolóxica "xusta" fronte ás súas políticas "improvisadas" que, ao seu modo de ver, teñen como resultado "o peche das centrais térmicas" como a de Naturgy en Meirama (Cerceda, A Coruña).
En declaracións aos medios antes da presentación dunha xornada de igualdade no ámbito laboral na Cidade da Cultura, Conde expresou que a Xunta "seguirá defendendo que se poida desenvolver un plan alternativo" que dea aos traballadores da planta a "resposta que necesitan", tras o anuncio do peche da factoría para 2020.
Neste sentido, o conselleiro volveu a denunciar o "incumprimento" de compromisos da empresa con Galicia, xa que "non está disposta a facer investimentos que outras empresas como Endesa", que mantén a central das Pontes, "si están dispostas a facer".
Ademais, criticou o proceso de transición enerxética "claramente improvisado" que mantén o Executivo de Pedro Sánchez, que "establece o peche das centrais". "Imos seguir traballando para que o Goberno asuma a súa responsabilidade e que faga unha transición xusta. E unha transición xusta é dar esa alternativa e esas oportunidades para que a comarca de Meirama poida ter unha solución nese proceso de transición enerxética", remarcou.
Precisamente, representantes do comité da central e auxiliares pasaron a madrugada encerrados no Concello de Ordes para manifestar a súa oposición á decisión de Naturgy de pechar a factoría e demandar ao Goberno galego a creación dunha comisión para defender en Madrid unha posición galega conxunta.
VULCANO E BANCO SANTANDER
Por outra banda, Conde tamén foi preguntado pola situación do estaleiro Vulcano de Vigo, cuxos traballadores demandan a mediación da Xunta para esixir que se lles paguen os seus salarios tras cinco meses sen cobrar, segundo denuncian.
Así, o conselleiro respondeu que o seu departamento "traballa con todas as partes para que se poida atopar unha solución, que pasa pola finalización do ferry". Por iso, aludiu a que iso require "necesariamente" que tanto o Banco Santander como a armadora Armas "poidan pór en marcha" o acordo bilateral que alcanzaron para que Vulcano "se poida comprometer, desde o punto de vista técnico e financeiro", co termo do buque.
"Desde a Xunta estamos a promover ese acordo. O vindeiro luns haberá unha reunión entre Banco Santander, PIMAR e o propio estaleiro para saber cales son as condicións que se inclúe nese acordo bilateral entre Santander e Armas", avanzou.
ISOWAT MADE
De igual modo, Conde abordou que tamén "seguen traballando con todas as partes interesadas" na procura de investidores para garantir a continuidade da factoría de Isowat Made na Coruña -en concurso de acredores- e salvagardar o emprego de 76 persoas, para o que comprometeu o "apoio financeiro" da Xunta "para que un investidor poida retomar a actividade".
"Neste momento hai que esperar a que finalice este prazo e esperemos que se poida atopar unha solución, complicada desde o punto de vista de atopar un investidor que poida dar continuidade ao conxunto dos traballadores", proseguiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.