A Xunta: "Xa hai máis alumnos que elixen a FP que o Bacharelato"
A conselleira de Educación, Universidade e Formación Profesional, Carmen Pomar, asegurou que a Formación Profesional de fai 20 ou 30 anos non teñen absolutamente nada que ver coa actual.
Por Europa Press / Redacción | SANTIAGO DE COMPOSTELA | 27/01/2019 | Actualizada ás 15:21
A conselleira de Educación, Universidade e Formación Profesional, Carmen Pomar, asegurou que cambiar "constantemente" a lei educativa "crea unha inestabilidade que prexudica aos máis débiles, que son os nenos" e avogou por un pacto educativo.
Así o sinalou nunha entrevista a Radio Nacional de España recollida por Europa Press, onde apuntou que estas variacións "non dan tempo a que se interiorice a lei, nin a que se asimile cales son os seus cambios". "Eu estou totalmente de acordo cun Pacto de Estado en materias educativas. Non se trata de pór unha lei fronte a outra. Probablemente haxa cousas doutras leis, non falo só da Lomce, senón doutras leis que se poderían aproveitar", engadiu Pomar.
FP
Pola súa banda, Pomar destacou que "está totalmente desterrado" considerar a Formación Profesional (FP) como unha carreira de "segundo nivel". "Está clarísimo que a Formación Profesional de fai 20 ou 30 anos non teñen absolutamente nada que ver coa formación profesional da actualidade. Investimos a proporción. Xa hai máis alumnos que escollen a Formación Profesional que Bacharelato", apuntou a conselleira.
Ademais, Pomar sinalou que, na contorna da FP, a innovación, a internacionalización, a tecnoloxía, o emprendemento e o contacto co tecido produtivo é "absolutamente fundamental". "En Ourense está previsto facer un centro de innovación e Formación Profesional que sirva de centro neurálxico para investigar en FP, para investigar novos módulos, novos roles profesionais e para que a Formación Profesional estea ao servizo da sociedade", indicou Pomar.
OPOSICIÓNS
En canto á convocatoria de 2.064 prazas públicas educativas, Pomar explicou que, desde hai uns anos, o Goberno galego "está a intentar recuperar" a taxa de prazas para oposicións perdida durante a crise.
"É a convocatoria máis numerosa dos últimos 12 anos e cremos que esa oferta vai responder ás necesidades reais do sistema educativo galego. Ademais, pensamos que están de acordo e satisfeitos os axentes sociais e educativos que forman parte da negociación e das conversas", apuntou a conselleira.
Respecto das catro prazas para profesores de portugués que a Xunta ofertará nas próximas oposicións, Pomar indicou que a Consellería realizou "unha análise das necesidades reais e das demandas reais" de dito idioma, "o que non quere dicir que nos próximos anos non se aumente o número de prazas de portugués".
