Expulsado do país a un alxerino por agredir un home "sen mediar palabra" na Coruña
A anterior sentenza condenaba o agresor a unha pena de tres anos e nove meses de prisión, ademais de obrigalo a indemnizar a vítima con preto de 6.000 euros.
Por E.P. | SANTIAGO DE COMPOSTELA | 30/01/2019 | Actualizada ás 12:17
A Audiencia provinicial da Coruña decretou a expulsión de España por un período de seis anos dun cidadán alxerino que propinou un cabezazo "sen mediar palabra" a un home na Avenida das Conchiñas, na cidade herculina.
O tribunal, nunha sentenza datada o pasado 20 de decembro, condena ao agresor a unha pena de tres anos e nove meses de prisión por un delito de lesións e a indemnizar á vítima con 5.906,83 euros. O xulgado acorda substituír a pena de prisión pola expulsión do acusado, M.A.M., do territorio español por un período de seis anos.
O fallo, sobre o que cabe recurso de apelación, considera probado que, aquel 25 de novembro de 2017, o condenado, que se atopaba no momento dos feitos en situación irregular, propinou un cabezazo "sen mediar palabra" a un home de 36 anos que transitaba pola citada avenida.
A consecuencia da agresión, a vítima sufriu un traumatismo polo que perdeu catro pezas dentais, logo substituídas por unha prótese. Os gastos sanitarios derivados da asistencia á vítima ascenderon a 903,74 euros, contía que o condenado deberá abonar ao Sergas.
