Por Europa Press / Redacción | SANTIAGO DE COMPOSTELA | 30/01/2019 | Actualizada ás 21:24
A Xunta afirmou que estuda a posibilidade de regular "excepcións" á prohibición de pastorear en zonas queimadas por un período de dous anos, unha norma que, segundo lembra a Consellería do Medio Rural, foi aprobada "polo goberno bipartito". O Goberno galego responde así á denuncia efectuada este mércores polo sindicato Unións Agrarias, que censurou a "culpabilización" dos gandeiros como causantes dos incendios, algo que considera "totalmente inxusto" e reclamou a modificación da Lei de Montes co fin de que permita o pastoreo unha vez rebrote a vexetación dos terreos queimados e non esperar dous anos para iso.
Así, Medio Rural sinala que a Xunta "está a seguir as recomendacións" do ditame da comisión sobre os incendios forestais celebrada no Parlamento galego, polo que estuda "regular" as prohibicións a pastorear en zonas "sempre que se acrediten perdas de difícil reparación pola prohibición do pastoreo ou a inexistencia de alternativas dentro da comarca" para estas prácticas. Ademais, o sindicato Unións Agrarias tamén denunciou que a aplicación telemática que utilizan os gandeiros para facer a solicitude das axudas da PAC (Política Agraria Común) da Unión Europea non permite sinalar parcelas que ardesen nun tramo de dous anos atrás, o cal cualificou unha "aberración" e "algo inxusto".
Respecto disto, a Xunta lembra que Europa "establece que non se poden facer pagos sobre superficies non admisibles para a agricultura, como ocorre cos terreos queimados". "Con todo, existen excepcións, cando a Administración forestal emite un certificado de que unha determinada superficie é susceptible de aproveitamento, a pesar de sufrir un incendio, por considerar que se recuperaron os pastos", sinala a consellería que dirixe José González.
Por último, o Goberno galego chama a afrontar a problemática dos incendios forestais con "seriedade e responsabilidade" por parte de "todos os axentes do rural". "Non se poden realizar acusacións sen probas a ningún colectivo pero é evidente que a inmensa maioría dos incendios son provocados e contra esta secuela temos que loitar todos xuntos", apunta. Así, lembra que o conselleiro mantivo reunións cos alcaldes do Macizo Central ourensán para abordar a problemática dos incendios, que arrasaron centenares de hectáreas nos primeiros días deste ano e que, segundo a Xunta, nun "90 por cento" dos casos foron "intencionados".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.