As obras de restauración do interior da Catedral de Santiago prologaranse todo o ano

A Catedral de Santiago prevé iniciar nos próximos días as obras de restauración do interior da basílica e das cubertas da nave principal e do cruceiro, unhas actuacións que se prolongarán todo o ano. A Catedral informou de que a restauración dos parámetros interiores e das bóvedas conta cun orzamento de 2,6 millóns e un prazo de execución de 12 meses. Con todo, indicou que se programou a obra cun horario intensivo para "reducir todo o posible" os prazos.

En concreto, a actuación programada consiste na restauración do conxunto de parámetros interiores e alicerces da catedral e inclúe a rehabilitación de elementos singulares como esculturas ou vidreiras.

Pola súa banda, o orzamento da restauración das cubertas da nave principal e do cruceiro ascende a 1,9 millóns de euros e o seu prazo de execución é de 18 meses.

A Catedral explicou que con estas obras busca solucionará os importantes problemas de filtración de auga, causantes das humidades no interior das bóvedas do templo.

ANO SANTO

A basílica compostelá informou de que estes traballos se enmarcan no convenio entre o Ministerio de Facenda, a Consellería de Cultura e a Fundación Catedral que habilita 17 millóns de euros para chegar a 2021 nas mellores condicións para celebrar o Xacobeo.

Por último, a Catedral precisou que todos os traballos se realizarán coa supervisión técnica e o asesoramento da Dirección Xeral de Patrimonio Cultural. Neste momento xa se certificaron, ou están en execución ou licitación, obras por un total de 12 millóns de euros.