Traballadores dos PAC consideran "insuficiente" a proposta do Sergas

Os traballadores dos Puntos de Atención Continuada (PAC) da Coruña cualificaron como "insuficiente" o borrador da proposta presentada polo Servizo Galego de Saúde (Sergas) ao comité de folga o pasado martes.

Despois de reunirse nunha asemblea co resto de áreas de Galicia, a plataforma PACs en pé de guerra da Coruña emitiu un comunicado no que, en cinco puntos, manifesta a súa desconformidade coa proposta e critica ao Sergas pola "présa por pechar a negociación" despois dun "ano sen tentar buscar solucións".

Neste sentido, censurou que trate de "pechar a negociación nunha mesa sectorial" en lugar de "pechar un acordo co comité de folga, onde están presentes os traballadores".

Os traballadores explican que a oferta lles parece "do todo insuficiente" xa que "dos once puntos solicitados soamente se tratan cinco".

Ademais, destacan que "en canto ao cómputo da xornada segue sen ser garantida a neutralidade en todos os permisos, só se parchean os de 3 a 5 días". Os traballadores dos PAC piden "a neutralidade en igualdade de condicións ao resto de traballadores".

Tamén consideraron "inconcibible" que non se fale de "prazos para implementar equipos completos" e tacharon de "falta de respecto" que "non estea concedido o 20 por cento dos complementos de festividade e nocturnidade".

Por último, expresaron o seu desexo de que "á mesa sectorial do próximo mércores 13 vaian cunha proposta con redacción clara e acorde ao once puntos".

Insisten no seu chamamento ás organizacións sindicais para que "manteñan o seu compromiso de informar e acatar as decisións da asemblea antes de asinar calquera acordo".