Por Europa Press / Redacción | SANTIAGO DE COMPOSTELA | 09/02/2019 | Actualizada ás 13:34
A portavoz nacional do BNG, Ana Pontón, volveu criticar a presenza prevista este domingo en Madrid do presidente da Xunta, Alberto Núñez Feijóo, na protesta convocada contra o Goberno de Sánchez, tras cambiar a súa axenda institucional, por demostrar que "é un vasalo" que entoa ante Pablo Casado "o se ti me dis vén, déixoo todo".
Tras a celebración do Consello Nacional da formación nacionalista, Pontón censurou que Feijóo demostrase que as súas prioridades son "primeiro, o PP, segundo, o PP e terceiro o PP", despois de que modificase a axenda institucional da súa viaxe a Estados Unidos, como presidente da Xunta, para poder estar na protesta do domingo, á que inicialmente anunciara que non podería acudir.
Para Pontón, Feijóo "abraza o discurso da ultradereita que lle marca Casado" e ironizou que a súa actitude lembra o coñecido bolero, porque "Casado díxolle vén, e Feijóo apurouse a coller un avión desde Nova York e plantarse en Madrid, que bo vasalo se tivese bo señor".
"Tanto dividirse e ao final xúntanse todos", ironizou sobre a protesta apoiada por PP, Ciudadanos e Vox, e á que tamén se suman grupos fascistas e neonazis como Falange, Hogar Social e España 2000.
Unha situación que enmarca nun contexto de "involución democrática" en España, "agravado" por unha "dereita con frenesí españolista e botada ao monte", que pon "autobuses a Madrid contra algo tan fundamental en democracia como é o diálogo", que mostra "a súa peor cara co machismo e o racismo", e ante unha esquerda á que lle marca as decisións a dereita.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.