A alcaldesa de Melide fala de "obsesión" con ela por parte dunha asociación local

A alcaldesa de Melide (A Coruña), Dalia García (PP), denunciou a "obsesión" e a "persecución" da que sente vítima por parte da Asociación Cultural e Veciñal de Melide, que iniciou accións legais polas condicións dunha praia fluvial da localidade. 

A alcaldesa deu conta do proceso iniciado polo presidente da asociación, Diego Rodríguez Otero, na Fiscalía da Coruña en 2018, por un presunto delito contra a saúde pública e medio ambiente. Segundo asegura, agora foi arquivado.

Así as cousas, a rexedora criticou a "obsesión" da asociación co goberno local. Ao seu xuízo, sufriu unha "persecución" con "desprestixios persoais continuos". O colectivo chegou a presentar unha causa penal por prevaricación "contra o medio ambiente, así como atentando contra a saúde pública".

Dalia García expresou as súas dúbidas sobre o "obxecto cultural ou veciñal desta organización". Neste sentido, insistiu en que, na súa opinión, "ten unha finalidade claramente política e non de defensa dos intereses veciñais".

A alcaldesa asegurou que se tratou dun "infrutuoso intento de xudicialización dun tema sobre o que o goberno municipal deu cumprida información no pleno de Melide", coa achega dun punto na orde do día no pleno ordinario "co fin de manter informada á oposición sobre a problemática".

García instou á asociación a que se "quite a careta dunha vez e se constitúa como partido político" de modo que "o xogo democrático sería moito máis xusto e entre iguais".

Afirmando que ten "a conciencia moi tranquila", censurou o intento de "instrumentalizar un problema ambiental" e que se alarmou "innecesariamente", o que considerou que é "a maneira de actuar dos que se agochan baixo siglas veciñais pero que realmente son outra cousa".

Nesta liña, insistiu en que "xudicializar a política non axuda a resolver os problemas dos veciños" e que "esta forma de actuar demostra, unha vez máis, que en política non todo vale".

TRABALLOS NO RÍO FURELOS

Como consecuencia das analíticas realizadas en 2016, que deron como resultado a cualificación de insuficiente das augas do río Furelos, o goberno local asegura que traballou con Augas de Galicia en busca de solucións.

Este labor conxunto concluíu que o deseño da zona de baño "é contrario á dinámica natural do leito do río e lesivo contra a súa canle natural". Segundo a alcaldesa, "encargáronse analíticas para cotexar a saúde do río" con "resultados positivos" que "autorizaron o baño en 2017".

García apoiouse no escrito de arquivo de dilixencias por parte da Fiscalía que di que "o resultado da análise encargada polo Concello non permite apreciar elementos indiciarios, non soamente da posible comisión dun delito contra o medio ambiente, senón tamén de que a decisión adoptada da apertura da zona de baño constitúa unha resolución inxusta, contraria palmariamente ao ordenamento xurídico".