Por Europa Press / Redacción | SANTIAGO DE COMPOSTELA | 11/02/2019 | Actualizada ás 19:19
En Marea e BNG rexistraron senllas iniciativas no Parlamento de Galicia a través das que preguntan polos gastos derivados da viaxe realizada a pasada semana polo presidente da Xunta, Alberto Núñez Feijóo, a Estados Unidos, así como polo cambio no voo para participar o domingo na concentración convocada en Madrid por PP e Ciudadanos, co apoio de Vox e secundada por grupos falanxistas e neonazis.
O portavoz de En Marea, Luís Villares, considerou necesario que os galegos saiban canto custou "ao erario público" a volta anticipada do presidente.
"Quen vai pagar iso, a Xunta ou o Partido Popular?", preguntou Villares, que sinalou que o "adianto e a cancelación dos actos non tiveron como causa a actividade institucional senón a partidaria".
Pola súa banda, o Bloque cuestionou canto vai custar a cada galego que o máximo mandatario autonómico "antepoña os intereses do seu partido á axenda institucional".
Ademais, a formación nacionalista esixiu que "a diferenza económica" derivada do cambio de billete corra a cargo do Partido Popular.
"Unha vez máis Feijóo mostrou o seu lado máis servil con Pablo Casado participando en Madrid nunha concentración que mesmo o obrigou a adiantar a súa viaxe", apuntou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.