A Xunta, nos xulgados por tratar como "trastorno común" a enfermidade dexenerativa dun menor

Uns pais de Oleiros (A Coruña) reclamaron, por vía xudicial, que se recoñeza ao seu fillo de 17 anos unha discapacidade por unha enfermidade dexenerativa que, segundo os proxenitores, foi tratada polo Equipo de Orientación e Valoración de Discapacidades da Xunta como "un trastorno común".

Despois de que este martes se celebrase nun xulgado do social a vista tras a demanda presentada polos pais —un xuízo que continuará o 23 de abril co testemuño do forense que emitiu un informe—, a nai do menor, Sandra Llopis, asegurou que o que queren é "que se recoñeza a verdadeira enfermidade" do seu fillo.

Tamén afirma que optaron por acudir aos tribunais despois de non recibir unha resposta satisfactoria aos seus escritos ante a administración e tras unha primeira valoración do seu fillo en 2014. "Tentamos facerlles ver polas boas que cometeran un erro", sinala a este respecto.

Da enfermidade do seu fillo, explica que é coñecida como "aniridia bilateral conxénita e dexenerativa" e que tamén ela padece. "Nacemos sen iris e iso trae outras enfermidades asociadas como problemas de retina, glaucoma...". Fronte ao que lle ocorre ao seu fillo, sinala que, no seu caso, se lle recoñeceu unha minusvalía grave do 89%.

PERDA DE VISIÓN

Ao menor, tras a avaliación que se lle realizou, "a Xunta dálle unha porcentaxe ridícula do 54%", engade Sandra Llopis. Con todo, insiste en que o menor "só ve un 24%", pero tampouco na súa totalidade xa que o fai de forma distorsionada. "E vai perder visión porque non hai cura", explica lembrando o que tamén lle sucedeu a ela.

Sandra Llopis apela aos informes médicos dos que dispoñen, pero tamén ao do forense. "Favorable a nós", asegura tras criticar que o equipo de valoración da Xunta falase, nun primeiro momento, de "trastorno común" e logo "quixese disfrazalo dicindo que o incluía nas 'enfermidades sensoriais e outras'".

Ademais dos problemas que leva esta enfermidade para o seu fillo, afirma que, o feito de que a Administración non lle recoñeza a discapacidade que entenden lle corresponde, supón para o menor "a perda de dereitos, de axudas que necesita para estudar".