Por Europa Press / Redacción | SANTIAGO DE COMPOSTELA | 13/02/2019 | Actualizada ás 20:14
O conselleiro de Economía, Emprego e Industria, Francisco Conde, asegurou este mércores que o presidente da Xunta, Alberto Núñez Feijóo, "cumpriu integramente" a súa axenda institucional durante a súa viaxe a Estados Unidos a semana pasada, aínda que adiantase a súa volta a España para acudir á manifestación convocada o domingo polo Partido Popular na Praza de Colón de Madrid contra as políticas de Pedro Sánchez.
Así respondeu Conde a unha pregunta formulada no Parlamento galego polo secretario xeral do PPdeG, Miguel Tellado, quen censurou á oposición (En Marea, PSdeG e BNG) por "dicir dúas cousas ao mesmo tempo, e desde o mesmo grupo", en canto á estancia de Feijóo en Miami e Nova York.
"O presidente non acurtaba a viaxe, senón que modificaba o horario. Primeiro din que a viaxe non vale para nada, logo din que os encontros son importantísimos como para alterar a axenda", esgrimiu, para despois indicar que o que o presidente fixo tanto en América como en Madrid foi "defender a Galicia e defender a España".
En canto á súa estancia en Estados Unidos, o conselleiro --que tamén estivo presente durante gran parte dos actos-- valorou que Feijóo mantivo o "obxectivo claro de abrir novos mercados e acompañar ao sector produtivo" de Galicia "no esforzo por competir na primeira liña" dos mercados mundiais" e "establecer relacións comerciais máis sólidas".
Froito deste traballo, tal e como sinalou Conde, é que as exportacións galegas aumentan anualmente "case un 2 por cento, alcanzando unha facturación de 500 millóns de euros". Deste xeito, previu que no ano 2019 "Galicia vai bater unha vez máis marca de exportacións".
Así as cousas, Tellado situou as críticas da oposición en "a mala conciencia que teñen". "Estamos a esperar a que o presidente Pedro Sánchez faga unha viaxe oficial a España para convocar eleccións", ironizou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.