Os traballadores dos PAC votarán o luns o borrador do Sergas, ao que reprochan "as présas"
O documento presenta novidades referidas ao cómputo da xornada laboral e aos complementos de nocturnidade e festividade. Dende o comité de folga critican que, cos prazos establecidos para a súa aplicación, "moitos xa estarán xubilados".
Por E.P. | SANTIAGO DE COMPOSTELA | 14/02/2019 | Actualizada ás 13:05
Os traballadores dos Puntos de Atención Continuada (PAC) teñen previsto votar o luns día 18 o borrador entregado este mércores polo Sergas aos sindicatos, en relación ás súas demandas de mellora.
Deste xeito, o comité de folga confirmou a Europa Press que sobre 900 traballadores dos PAC de Galicia -entre médicos e persoal de enfermaría- están chamados a votar o documento entre as 9,00 e as 12,00 horas nas diferentes áreas sanitarias.
En relación a iso, a integrante do comité de folga, Ana Boedo, manifestou a Europa Press que convocan a votación con urxencia porque o Sergas fixou outra mesa sectorial sobre os PAC o luns pola tarde.
"Como poden dicir nunha primeira reunión, hai un ano, que non lles consta o contido dos nosos problemas? É unha primeira mala contestación", reprochou esta representante do comité para criticar que "agora non pode vir con esas présas".
PUNTOS PERFILADOS
Sobre o documento facilitado aos sindicatos -que se comprometeron a ter en conta a opinión dos traballadores dos PAC antes de asinar nada, segundo asegurou Boedo-, o comité apunta que "perfilaron algún punto máis" en relación ao cómputo de xornada para que garanta a neutralidade no cálculo, que agora inclúe aspectos como o permiso de paternidade.
Como novidade, Boedo trasladou que inclúe "a maiores" o 20% do complemento de nocturnidade e festividade que reclamaban, pero criticou que "o fan nuns prazos", a razón do 40% dese 20% a percibir en 2020 e o 60% en 2021. "Moitos xa estarán xubilados", concluíu.
