Feijóo ve a escolla da data electoral como un "capricho" de Sánchez e di que custará "200 millóns aos españois"

O presidente da Xunta de Galicia, Alberto Núñez Feijóo, asegurou que "non é aceptable" que os "caprichos partidistas" do presidente do Goberno, Pedro Sánchez, "custen 200 millóns de euros aos españois e galegos", en referencia á decisión do Executivo central de celebrar as eleccións xerais o 28 de abril e non o 26 de maio, xunto coas municipais.

Tal como sinalou o Partido Popular de Galicia nun comunicado, Feijóo destacou "a enorme inestabilidade que provocou Sánchez ao conxunto do país" xa que, ao seu xuízo, "paralizou España en 2016, en 2018 e volveu tentalo en 2019".

"Eses millóns que serán utilizados para satisfacer as necesidades electorais do Partido Socialista poderían ser investidos na Sanidade pública, na Educación pública, en atención ás persoas dependentes ou en infraestruturas", criticou o presidente galego.

Feijóo subliñou que convocar eleccións era "imprescindible" pero facelo a menos dun mes doutras é "tremendamente irresponsable", o que evidencia "que Sánchez pensa soamente en si mesmo".

"España necesita algo mellor que un presidente que cre que o único importante de España é el mesmo", asegurou Feijóo, quen engadiu que o país necesita "estabilidade", así como "un goberno responsable" que teña en conta "as necesidades dos españois de Galicia".

Neste sentido, o líder do PPdeG manifestou que os populares reivindican Galicia como "a súa terra" xa que "son galegos con orgullo e, ao mesmo tempo, españois", e lamentou que "exista unha minoría en Galicia que opine distinto". Exemplificou este punto referíndose ao PSOE, "que prefire entregarse ao populismo ou o independentismo".

Así, na presentación dos candidatos do PP ás alcaldías pontevedresas da Cañiza (Miguel Domínguez), Arbo (Horacio Gil Expósito), Covelo (Juan Pablo Castillo) e Crecente (Julio César Luengo), Feijóo sinalou que "Sánchez xa é só o pasado e Galicia ten futuro". "Irase do Goberno e ninguén o botará de menos, nin tan sequera no PSOE", remarcou Feijóo.

CRÍTICAS

Dende o PSdG xa deron a coñecer a súa posición ao respecto destas declaracións de Núñez Feijóo. Gonzalo Caballero acúsao de volver "desdicirse" ao criticar a data das eleccións. Asegura que o presidente da Xunta pedía eleccións "canto antes", mentres que agora critica a decisión de anticipalas a abril. "Anuncia que se vai paralizar o país nos próximos meses, cando foi o PP o que reclamaba eleccións xerais", reprochou o socialista.