Máis impulso á Eurorrexión Galicia-Norte de Portugal cun novo plan de investimentos e I+D+i

A Agrupación Europea de Cooperación Transfronteiriza (AECT) Galicia-Norte de Portugal acordou a redacción dun novo plan de investimentos para o período 2021-2027 e actuacións en materia de I+D+i. Así se acordou este luns, tras as reunións da Asemblea e o Consello Superior dos órganos directivos desta AECT, que se celebraron en Vigo.

A Asemblea deu luz verde ao comezo dos traballos de redacción dun novo plan plurianual de investimentos conxuntos, que dea continuidade ao actual.

No encontro, no que participaron representantes da Xunta, tamén se aprobou o plan de actividades para este ano, que recolle, entre outras actuacións, un cume entre Galicia e o Norte de Portugal, xunto con representantes dos gobernos español e luso, sobre incendios forestais e outras emerxencias; un encontro de cooperativas ou a celebración dun fórum sobre demografía.

Finalmente, a AECT Galicia-Norte de Portugal fixo balance das actividades de 2018, entre as que figura o programa Iacobus (para a cooperación e intercambio de recursos humanos entre universidades e centros tecnolóxicos da eurorrexión), as actividades culturais integradas no programa Nortear, o cume de Turismo celebrada no Porto, o 'Job Day' do sector TIC celebrado en Vigo ou o seminario sobre prestación de servizos públicos transfronteirizos, entre outras iniciativas.