Noriega cre que a fórmula de Villares para o 28-A "é a que peor encaixe ten" e pide unha coalición

O alcalde de Santiago, Martiño Noriega, sumouse este martes á petición do seu homólogo coruñés, Xulio Ferreiro, para configurar unha coalición electoral entre os diferentes actores de En Marea de cara a evitar que a confluencia galega se divida en dúas candidaturas para as xerais do próximo 28 de abril.

No verán de 2016, Noriega encabezou, xunto aos 'alcaldes do cambio', os movementos para configurar En Marea como partido instrumetnal de adscrición individual que trasladase ao ámbito autonómico o modelo das mareas municipalistas. Agora, o rexedor compostelán non cre que esa fórmula sexa a axeitada para presentarse ás xerais. Na mañá deste martes, a preguntas dos xornalistas, Noriega apostou por unha coalición electoral.

"Non sei se é pola fórmula do partido instrumental en si mesma ou por determinadas dinámicas que se deron, pero parece que (o modelo de partido instrumental) é o que peor encaixe ten", indicou o alcalde de Santiago e líder de Compostela Aberta, marea que se aliña no sector crítico coa dirección de En Marea que encabeza Luís Villares.

Deste xeito, Noriega súmase á chamada á unidade efectuada polo rexedor herculino, Xulio Ferreiro, quen o pasado luns instou a evitar a división de En Marea en dúas candidaturas. Propoñía unha coalición entre os partidos Anova, EU e Podemos, as mareas municipalistas e a dirección de En Marea.

Con todo, estes últimos descartan o modelo de coalición, pois, segundo sostén Luís Villares, impediría a conformación de grupo parlamentario propio e, ademais, "reduciría" a democracia e participación interna. Pola súa banda, EU e Podemos Galicia xa fixeron pública a súa intención de non concorrer baixo o paraugas de En Marea e, deste xeito, repetir a coalición das últimas xerais.

Pola súa banda, Anova, formación nacionalista da que o propio Noriega é cofundador e unha das súas principais referencias, emprazou ao próximo sábado -día no que se reúne a súa dirección- para decidir a súa postura definitiva sobre a maneira na que concorrer á cita coas urnas do próximo 28 de abril.

CHAMADA Á UNIDADE

"Queremos para o noso país o que temos na nosa cidade", subliñou Noriega, que puxo o acento en que é preciso a "unidade" ante un "momento histórico" no que "a extrema dereita pode entrar nas institucións blanqueada pola dereita".

O líder de Compostela Aberta, marea configurada como unha organización de adscrición individual e non como unha coalición de partidos, considera que "o espazo das mareas municipalistas é diferente" e que o modelo de partido instrumental funciona "no local" pero non no ámbito galego, onde partidos como EU e Podemos rexeitan diluírse en En Marea.

Por iso, cre que esa fórmula é na actualidade "a que peor encaixe ten" para sumar baixo una mesma lista a todos os actores de En Marea. Deste xeito, avoga por volver a unha coalición electoral, aínda que recoñece que "hai xente en determinadas posicións que pensan que iso xa non se pode dar", en referencia velada a Luís Villares.