Un parque biosaudable na Lama

A Consellería de Medio Ambiente, Territorio e Vivenda e o Concello da Lama (Pontevedra) colaborarán para a execución dun parque biosaludable en Eido de Abaixo, na parroquia de Xesta. O Goberno galego achegará 63.700 euros dunha obra que custará algo máis de 91.000, mentres que o resto correrá a cargo do executivo local.

Na mañá deste xoves, a conselleira de Medio Ambiente, Anxos Vázquez, asinou o convenio de colaboración co alcalde da localidade, Jorge Canda.

Segundo a Xunta, o acordo "mellorará a calidade de vida dos veciños ao pór á súa disposición unha ampla área de esparexemento que sirva como punto de encontro para compartir o seu tempo de lecer". Vázquez argumentou que a elección desta parroquia se debe a que "é un dos puntos que no verán experimenta un maior incremento do número de habitantes".

O proxecto ten como obxectivo "executar unha nova zona de recreo de máis de 1.100 metros cadrados e que disporá de xogos biosaludables para adultos, mesas e bancos, unha pérgola, unha fonte e unha zona con asador". Ademais, tal e como informou a Consellería, "efectuaranse traballos para a mellora da accesibilidade, que consistirán na urbanización do viario e na execución de beirarrúas, ademais de acondicionarse a contorna para dotala cun aparcadoiro".

O prazo de execución, unha vez contrátense as obras, é de tres meses, co que a consellería prevé que estea en funcionamento antes do comezo do verán.