Esquerda Unida di que En Marea xa non lles vale como "casa común do rupturismo"

A coordinadora nacional de Esquerda Unida, Eva Solla, afirmou que os deputados de En Marea no Congreso funcionaron como "un grupo propio" que defendeu os intereses de Galicia durante a pasada lexislatura a pesar de estar integrado no Grupo Confederal de Unidos Podemos.

Nunha entrevista na Radio Galega na mañá deste mércores, Solla respondeu desta forma a uns dos principais argumentos sostidos polo portavoz de En Marea, Luís Villares, para rexeitar a reedición dunha coalición electoral: a imposibilidade de articular un grupo propio no Congreso, como sucedeu en 2016.

"Xa tiñamos un grupo no Congreso nestes anos. Seguen, formalmente e a nivel administrativo, traballando dentro do grupo confederal Unidos Podemos pero o funcionamento foi o dun grupo propio de Galicia. Durante estes anos defendéronse cuestións relevantes para o país. Iso é o importante e así vai seguir sendo, esperemos, nesta lexislatura", afirmou.

Así as cousas, a tamén deputada de En Marea insistiu en que a aposta de Esquerda Unida é reeditar a coalición electoral conas forzas " irmás" Podemos e Anova, coas que manteñen "contactos" para repetir o modelo de 2015 e 2016, ao que se sumarían as mareas municipalistas de, polo menos, Santiago e A Coruña.

O enfrontamento de posturas entre a dirección de En Marea, que se presentará en solitario e como partido ao 28 de abril; e os actores do sector crítico que propoñen unha coalición --Anova, EU, Podemos e as mareas municipalistas de Santiago, A Coruña e Ferrol-- abocan á división do proxecto rupturista en dúas candidaturas para a cita do 28 de abril.

DÚAS CANDIDATURAS

Solla recoñece que a existencia dúas candidaturas "non sería positivo para a xente que apoiou as confluencias noutros momentos" porque "pode existir confusión á hora de escoller a papeleta".

Así as cousas, cualifica de positiva a chamada á unidade ao redor dunha coalición entre Anova, EU, Podemos, as mareas municipalistas e En Marea partido efectuada polo alcalde coruñés, Xulio Ferreiro, e apoiada polo seu homólogo compostelán, Martiño Noriega.

Esquerda Unida rexeita así concorrer ás eleccións baixo o paraugas de En Marea, "unha ferramenta" que foi construída "como parido porque era positivo para a participación doutra xente", pero que, segundo Solla, debido ao rumbo tomado por Villares e os seus afíns provocou que En Marea deixase de ser un punto de encontro das forzas rupturistas para converterse nunha organización propia.

"Desgraciadamente outras persoas tiveron unha lectura diferente e tomaron esa ferramenta para usala en aras de convertela nun partido clásico", asegurou Eva Solla en referencia ao sector que controla a dirección de En Marea e que "opera como calquera outro partido" polo que "toman as súas decisións como fan o resto de organizacións políticas".

CRÍTICAS DE EN MAREA

Precisamente, este mesmo mércores a portavoz da coordinadora de En Marea, Ana Seijas, afeou aos 'alcaldes do cambio' --Martiño Noriega (Santiago) e Xulio Ferreiro (A Coruña)-- que chamen a articular unha coalición entre os diferentes actores do 'rupturismo' para as eleccións xerais e non concorrer baixo o paraugas do partido instrumental cando as mareas que eles mesmos lideran están constituídas con esa fórmula.

MARTIÑO NORIEGA

O alcalde de Santiago, Martiño Noriega, asegurou que a postura que mantén xunto co seu homólogo coruñés, Xulio Ferreiro, para evitar a división de En Marea en dúas candidaturas para as xerais é "unha chamada á unidade máis aló da fórmula" para presentarse ás eleccións.

Así respondeu este mércores Noriega ás críticas lanzadas desde a dirección de En Marea que, minutos antes, afeara aos 'alcaldes do cambio' que promovan a creación dunha coalición para o 28 de abril cando eles mesmos lideran mareas configuradas como partidos.

"O que é bo para o local é bo para o estatal", aseguraba a portavoz da coordinadora de En Marea, Ana Seijas, durante a presentación das primarias do partido instrumental, que descarta reeditar o modelo de coalición de 2015 e 2016 --postura que defenden Anova, EU e Podemos-- e presentarase en solitario ás eleccións.

"Non teño nada que engadir nin vou entrar en diálogos. (Os alcaldes) Estamos a facer unha chamada á unidade máis aló da fórmula e adaptarnos ás circunstancias neste momento histórico", indicou Martiño Noriega, que afirma que a postura dos rexedores "é construtiva" porque "busca a unidade".

"A posición construtiva é aquela que busca a unidade. Necesítase xente que tenda pontes. A posicion de Xulio (Ferreiro) e a miña é ser responsbales e evitar o diálogo dentro do espazo político porque só é ruído", resolveu o alcalde santiagués e líder de Compostela Aberta.