O Parlamento galego reclama ao Goberno central retomar a negociación co Grupo Endesa para un convenio marco
Tamén pide ao Goberno que mentres non haxa novo convenio se manteñan as condicións no último acordo eléctrico.
Por Europa Press / Redacción | SANTIAGO DE COMPOSTELA | 20/02/2019 | Actualizada ás 16:26
O Parlamento de Galicia aprobou este mércores unha proposición non de lei na que insta á Xunta a solicitar ao Goberno central que "esixa ao Grupo Endesa retomar a negociación dun novo convenio marco". A iniciativa, defendida polo Grupo Popular en comisión parlamentaria e que contou con dez votos a favor e dúas abstencións, céntrase nas demandas a realizar polo Goberno galego en relación coa negociación dun novo convenio colectivo polo Grupo Endesa.
En concreto, pídese "que esixa ao Grupo Endesa retomar a negociación dun novo convenio marco, respectando a actual mesa negociadora, e mentres este non se formalice, manter activas as condicións establecidas no IV Convenio Marco".
Ademais, no texto aprobado, aposta por "aplicar o disposto no IV Acordo Marco para o Emprego e a Negociación Colectiva 2018-2020 asinado en xullo de 2018 co consenso dos axentes sociais".
