Noriega censura a "deslealdade" da Xunta cos concellos que non goberna o PP
Tamén critica as propostas do candidato socialista Sánchez Bugallo porque están "enmarcadas na melancolía" e "non son construtivas".
Por E.P. | SANTIAGO DE COMPOSTELA | 21/02/2019 | Actualizada ás 18:30
O alcalde de Santiago, Martiño Noriega, censurou a "deslealdade" da conselleira de Infraestruturas e Movilidade, Ethel Vázquez, cos concellos galegos que non goberna o Partido Popular e acusouna de exercer o seu cargo de forma "máis partidaria" que "institucional".
Así se pronunciou este xoves o rexedor compostelán antes de visitar unhas obras realizadas polo Consistorio en San Lázaro e despois de que transcendese que a Axencia Galega de Infraestruturas remitiu ao Consistorio unha carta na que reclama melloras nos viarios da contorna da variante de Aradas e da Cidade da Cultura.
Respecto diso, Noriega considerou que esta misiva se enmarca na "praxe" da conselleira respecto das relacións que establece cos concellos que, na súa opinión, responden a un rumbo máis "partidario" que "institucional". Ademais, asegurou que esta "queixa" pola actitude da titular de Infraestruturas é xeneralizada entre os municipios non gobernados polo PP.
Dito isto e tras destacar que a lectura que se fixo respecto da conectividade do Gaiás e dos barrios de Fontiñas e Sar por parte do Consistorio foi "correcta", asegurou que "se está comprobando que non existe ningún tipo de problema".
"E respecto doutras solicitudes, está a traballarse nelas", manifestou antes de mostrarse sorprendido por "este tipo de cartas reivindicativas" desde o Goberno galego. "Se as relacións institucionais se establecen niso, empezaremos a mandar cartas de moitísimas cuestións pendentes que hai na cidade", ironizou antes de deixar claro que o actual goberno de Santiago "opera noutras claves, que son máis de lealdade institucional".
"Eles saben que hai un proxecto dunha nova rotonda non xusto onde termina a variante de Aradas, senón nunha zona do polígono máis adiante, que está o proxecto redactado", explicou para lembrar que o Consistorio debe facer "modificativos de crédito" para poder executar as obras. "E non é tan fácil como ter os orzamentos aprobados", engadiu.
CRÍTICAS A BUGALLO
Por outra banda, o alcalde tamén se referiu a as críticas realizadas polo candidato socialista á Alcaldía de Santiago de Compostela, Xosé Sánchez Bugallo, ao proxecto do Concello de accesos á estación intermodal.
Respecto diso, o alcalde de Santiago considerou que as críticas do socialista están "enmarcadas na melancolía" e "non son construtivas". "Nos meses que leva de candidato condicionou cambios de posición do grupo municipal para bloquear cuestións que eran facilitadoras dunha nova cidade, se esa é a receita que dás a unha cidade que queres mellorar, o que estás a provocar é un dano no día a día e repercutir o debate nos veciños", apuntou.
