O sector da enfermaría en guerra contra a Xunta por "volver a Atención Primaria aos 70"

A Asociación Galega de Enfermaría Familiar e Comunitaria (Agefec) presentará unha emenda á totalidade do documento con propostas da Consellería para a reforma da Atención Primaria xa que o consideran "un grave prexuízo para os intereses da cidadanía e por querer retroceder a Atención Primaria a un sistema de ambulatorio da década dos 70".

O colectivo informou, a través dun comunicado, de que "o documento presentado por Sanidade está a xerar un grave malestar e crispación nos enfermeiros da Atención Primaria de Galicia, agravando de forma considerable o conflito actual, xa que retrotrae o modelo de atención que proporcionan estes profesionais aos usuarios do sistema público á década dos 70".

Tras facer unha análise preliminar do documento, Agefec asegurou que "a maior parte das propostas" presentadas á Consellería "non foron incluídas", o que tildan de "menosprezo e falta de consideración".

Nesta liña, engadiu que as propostas que realizaron eran para "a mellora do sistema e non de beneficio individual", e que "a única petición de remuneración económica que se lle solicitou foi a compensación xusta para compensar a penosidade de realizar a Atención Domiciliaria no vehículo particular".

Ademais, subliñou que "o que a Consellería vende como novas competencias, non son tales", xa que se trata de competencias que "os enfermeiros de Atención Primaria tiveron, recoñecéronse e consolidaron formalmente coa especialidade de Enfermaría Familiar e Comunitaria". "A diferenza", prosegue o comunicado, "é que eran exercidas polos profesionais médicos, xa que o sistema sanitario estaba enfocado a curar, e agora débenas exercer os enfermeiros de Atención Primaria, xa que se debe reorientar o sistema sanitario a curar e coidar".

Así, a Agefec entende que "o documento presentado en forma de borrador debe ser mellorado na súa totalidade para conseguir unha Atención Primaria adecuada aos tempos e ás necesidades da nosa poboación".

XUNTA

O conselleiro de Sanidade, Jesús Vázquez Almuiña, respondeu ás críticas que algúns sectores de médicos e enfermeiros verteron contra a proposta de reforma da Atención Primaria por parte da Consellería, e asegurou que leva a un modelo "máis efectivo que o actual". No entanto, o conselleiro recoñeceu que o documento "non está pechado" e que "ata final de mes pódense facer alegacións e recoller máis suxestións".