O ex líder do PSdeG prevé presentar esta semana en Ourense o seu novo partido para as municipais
Gonzalo Caballero quita ferro ás "operacións persoais" de Pachi Vázquez: "Á xente preocúpanlle moi pouco".
Por Europa Press / Redacción | SANTIAGO DE COMPOSTELA | 25/02/2019 | Actualizada ás 11:49
O que foi secretario xeral do PSdeG entre 2009 e 2013, Manuel 'Pachi' Vázquez, prevé presentar publicamente esta semana en Ourense o seu novo partido político de cara ás próximas eleccións municipais do 26 de maio.
Segundo informou a Europa Press o que tamén foi conselleiro de Medio Ambiente de Emilio Pérez Touriño, a presentación terá lugar esta semana na cidade de Ourense.
Neste novo proxecto político previsiblemente incorporaranse exmilitantes socialistas que deixaron os seus cargos nas respectivas asembleas locais de Piñor, Maceda e O Carballiño tras diferenzas coa dirección provincial do PSdeG.
Cuestionado sobre este asunto durante a súa participación nun acto en Santiago, o secretario xeral do PSdeG, Gonzalo Caballero, restou importancia ao que denomina como "operacións persoais" que, ao seu xuízo, "preocupan moi pouco á xente neste tempo tan relevante para o país". "Que cada un saiba da súa vida o que quere facer", apostilou.
"Aos cidadáns o que agora lles preocupa é que imos facer co país. Se imos apostar polo avance, o progreso dun goberno liderado polos socialistas; ou se imos deixar que a dereita e a ultradereita fagan unha operación de retorno ao pasado que non queremos", resolveu.
