Queixas pola caída do sistema de caixeiros e o servizo electrónico de Abanca durante horas
Os pagos con tarxeta en comercios funcionan correctamente.
Por Europa Press / Redacción | SANTIAGO DE COMPOSTELA | 26/02/2019 | Actualizada ás 21:00
Os caixeiros automáticos e o servizo de banca electrónica de Abanca acumulan varias horas sen funcionar ao longo deste martes debido a unha "incidencia", segundo sinala a entidade.
Abanca emitiu unha mensaxe a través das redes sociais esta tarde no que informa de que os seus "servizos a distancia non están dispoñibles", aínda que están "a traballar para solucionar o problema".
Ante as numerosas queixas recibidas por usuarios a través das redes, a entidade financeira sinalou que os pagos con tarxeta en comercios están a funcionar correctamente, á vez que lamenta as molestias ocasionadas aos clientes.
Todo iso, nunha xornada na que Abanca renunciou a formular unha Oferta Pública de Adquisición (OPA) de accións sobre Liberbank, que segue traballando, pola súa banda, na operación de fusión por absorción con Unicaja.
