A CSIF reclama que a Xunta reduza o horario lectivo docente

A CSIF instou á Xunta a reducir o horario lectivo do profesorado do ensino público e manter como máximo 23 horas lectivas en Infantil, Primaria e Educación Especial e 18 horas en Secundaria e outros corpos.

Así o demandou despois de que o Congreso dese luz verde ao proxecto de lei de mellora das condicións para o desempeño da docencia e o ensino no ámbito da educación non universitaria, impulsado pola ministra de Educación, Isabel Celaá, para acabar coas últimas medidas vixentes do Real Decreto aprobado polo goberno de Mariano Rajoy en 2012 para aplicar recortes en educación. Entre elas, o aumento do horario lectivo do persoal docente ata as 25 horas en Educación Infantil e 20 horas nos restantes ensinos.

Respecto diso, nun comunicado, a CSIF lembrou que a Cámara baixa deu luz verde a esta redución e deixou en mans das comunidades autónomas a regulación, renunciando así a unha homologación deses horarios en toda España, que é o que pedía o sindicato.

Por iso, a CSIF lamentou que, unha vez máis e por razóns "totalmente partidistas", o Congreso rexeitase unha emenda aprobada no Senado (o 7 de febreiro) na que se pedía a fixación dese horario para toda España.

O sindicato cualificou de "verdadeiro despropósito" que o Congreso aceptase nun texto legal que o ministerio "non faga valer a súa condición de Goberno central" e "non garanta a igualdade de oportunidades na educación de todos". "Non fixar un horario homólogo incidirá en posibles diferenzas entre os docentes das diferentes comunidades", apuntou.

A Conselleira De Educación, Universidade E Formación Profesional, Carmen Pomar.. XUNTA DE GALCIA