A Xunta de Goberno da Coruña abordará este xoves un modificativo de 14 millóns
Será un modificativo sobre o orzamento prorrogado e que servirá para afrontar gastos obrigatorios que teñen prioridade.
Por E.P. | A CORUÑA | 27/02/2019 | Actualizada ás 20:30
O executivo local da Coruña levará este xoves a Xunta de Goberno Local extraordinaria, para a súa posterior aprobación no pleno que se celebrará o día 11, un modificativo, sobre o orzamento prorrogado actualmente en vigor, por importe de algo máis de 14 millóns de euros.
Así o informou, en rolda de prensa, a concelleira de Facenda, Eugenia Vieito, que explicou que a cantidade será empregada para cubrir gastos obrigatorios que teñen prioridade e que non están previstos nas contas en vigor, como a cantidade necesaria para dar cumprimento á sentenza homologada do antigo edificio de Fenosa, proxectos nos barrios ou os convenios con entidades.
A concelleira asegurou que o goberno local vese "na necesidade de recorrer a esta solución para sacar adiante investimentos nos barrios que foron tombados polos grupos do PP e o PSOE, que impediron a aprobación do orzamento municipal de 2019".
