O Concello de Lugo insiste na "necesidade" dun novo xulgado do Social e Villares levará a petición á Cámara

Unha decisión unánime de todos os grupos municipais dá pé a unha "declaración institucional" para solicitar que se rectifique a determinación de non dotar a cidade dun novo órgano xudicial deste tipo.

Por E.P. | SANTIAGO DE COMPOSTELA | 28/02/2019 | Actualizada ás 14:02

Comparte esta noticia

O Concello de Lugo, a través dunha "declaración institucional" subscrita polo seis grupos políticos (PSOE, PP, Lugonovo, BNG, Ciudadanos e ACE), reclama un novo xulgado do Social "por necesidade". O portavoz de En Marea, Luís Villares, levará a petición ao Parlamento galego.

Antes do pleno no que se deu conta de dita declaración, a alcaldesa de Lugo, Lara Méndez, aclarou que se trata dunha "necesidade". "Por tanto, imos reivindicar cunha declaración unánime de todos os grupos ese xulgado do Social, porque os datos corroboran a súa necesidade", sostivo.

Méndez confía celebrar "en breve" un encontro coa ministra de Xustiza, Dolores Delgado, "para trasladarlle persoalmente esta necesidade e tentar conseguir ese xulgado do Social".

Xa nos xulgados de Lugo, na Praza de Avilés, o portavoz de En Marea, Luís Villares, e a avogada de Comisións Obreiras ,Teresa Burgo,  tamén apelaron á necesidade dese novo xulgado do Social.

"GRANDES PREXUDICADOS"

Teresa Burgo manifestou que "os grandes prexudicados con esta decisión son os traballadores que se atopan nunha situación de indefensión e de absoluto desamparo á hora de reclamar os dereitos laborais, económicos e sociais".

Nesta liña, puntualizou que se producen esperas "para dous anos vista para ter un xuízo". "Despois diso ten que vir a sentenza e se despois temos sorte de que non recorra a parte empresarial", engadiu.

Así, dixo que ten claro que "isto beneficia á patronal e é unha forma máis de precarización das condicións laborais". "Esta situación, coloca os traballadores de Lugo como persoas de terceira. Se comparamos isto con Ourense, en Ourense hai catro xulgados do social e en Lugo só temos tres", censurou a sindicalista.

REIVINDICACIÓN AO PARLAMENTO

Pola súa banda, Villares preguntouse "se estas son as políticas progresistas que nos esperan co Partido Socialista", á vez que avanzou que levará esta reivindicación ao Parlamento galego.

O portavoz de En Marea lamentou que o Goberno galego desatendese a demanda dun xulgado específico contra a violencia de xénero en Lugo. Isto levoulle a cuestionar que "o Partido Popular dá pasos atrás na súa loita pola igualdade". "Nós témolo claro, os seus pactos coa extrema dereita, con Vox en Andalucía, están a condicionar moito o seu discurso (o do PP) sobre igualdade. Condenamos que o PP faga este tipo de movementos, porque nos parece que é lesivo para a igualdade e para as mulleres vítimas de violencia de xénero", concluíu Villares.

Así mesmo, o senador popular Xosé Manuel Barreiro rexistrou na Cámara Alta unha moción para solicitar a dotación dun novo xulgado do Social en Lugo, na que alega que "conta co apoio dos datos estatísticos".

Xulgado de Lugo
Xulgado de Lugo | Fonte: EP

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta