Temas: LEI MORDAZA BNG

O BNG pide ao Parlamento galego compromiso para pedir a derrogación da 'lei mordaza'

O Bloque rexistra unha Proposición Non de Lei (PNL) para que casos como o dos sindicalistas vigueses Carlos Rivas e Serafín Rodríguez "non se volvan a repetir".

Por Europa Press / Redacción | VIGO | 28/02/2019 | Actualizada ás 17:45

Comparte esta noticia

O BNG rexistrou unha Proposición Non de Lei (PNL) no Parlamento de Galicia para instar o Goberno central á derrogación da chamada 'lei mordaza', para que casos como o dos sindicalistas vigueses Carlos Rivas e Serafín Rodríguez (condenados a prisión tras a súa participación nun piquete durante unha folga, e indultados hai tres semanas polo Ministerio de Xustiza) "non se volvan a repetir".

O BNG presenta unha PNL para a derrogación da 'lei mordaza' e evitar outro cas. BNG
O BNG presenta unha PNL para a derrogación da 'lei mordaza' e evitar outro cas. BNG | Fonte: Europa Press

A deputada nacionalista Montse Prado presentou este xoves a proposta, acompañada polo candidato do BNG á Alcaldía de Vigo, Xabier Pérez Igrexas, e subliñou que esa lei, en concreto o artigo 315.3 do Código Penal, "vulnera dereitos fundamentais" e busca "paralizar a resposta social e atemorizar á sociedade e ao movemento obreiro e colectivos estudantís".

Prado incidiu en que este marco legal "regresivo" impide dereitos como o de reunión ou expresión, "e nega mesmo a presunción de inocencia", polo que pediu ao Parlamento galego que "non se manteña á marxe do debate".

A parlamentaria do BNG puxo o exemplo da condena a prisión dos sindicalistas vigueses Carlos Rivas e Serafín Rodríguez, en 2011, e esixiu a retirada dese artigo do Código Penal para que ningún traballador teña que pasar "polo calvario" que sufriron estas dúas persoas.

Pola súa banda, o candidato á Alcaldía, Xabier Pérez Igrexas, pediu que este debate forme parte da "axenda política", agora que se convocaron eleccións xerais, e instou a PP e PSOE a que "se retraten" e digan "se van impedir que persoas inocentes poidan correr o risco de ir a prisión por facer folga ou manifestarse".

Temas: LEI MORDAZA BNG
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta