En Marea camiña xa cara as eleccións Xerais sen Podemos, Izquierda Unida e Anova
Só afíns á dirección de Villares se postulan nas primarias. Ana Seijas, Iris Malvido, Iván Olmos e Cristina Pérez encabezan as candidaturas oficialistas para as Cortes. Lida Senra é a proposta para as europeas
Por Europa Press / Redacción | Compsotela | 01/03/2019 | Actualizada ás 14:59
Un total de nove candidaturas, todas promovidas pola dirección do partido instrumental que encabeza Luís Villares, concorren ás primarias de En Marea para a configuración das listas para as eleccións xerais (Cortes e Senado) do 28 de abril e os comicios ao Parlamento europeo, que se celebrarán o 26 de maio.
Así, a pesar das invitacións a participar no proceso efectuadas polo líder de En Marea, Luís Villares; o sector crítico --integrado por Anova, EU, Podemos e as mareas municipalistas de Santiago, A Coruña e Ferrol-- abstéñense de participar nas primarias, o que aboca a En Marea a dividirse en dúas candidaturas para o próximo 28 de abril.
Deste xeito, oito candidaturas oficialistas concorren ás primarias para configurar as listas das catro provincias galegas para as Cortes e o Senado. Para o Parlamento europeo, a actual eurodeputada Lídia Senra figura como número un da proposta da dirección de Luís Villares.
Segundo confirmaron a Europa Press fontes do partido instrumental, a actual viceportavoz da coordinadora, Ana Seijas, ocupa o número un da lista pola Coruña; mentres que en Pontevedra a opción da cúpula de En Marea é Iris Malvido. O graduado en Comunicación Audiovisual pola USC Iván Olmos en Ourense e a portavoz de Lugonovo Cristina Pérez en Lugo, completan as cabezas de lista das candidaturas ás provincias galegas para o Congreso.
