A Seguridade Social gaña 4.940 afiliados en febreiro en Galicia, aínda que segue por baixo do millón
O total de cotizantes queda en 997.31, por baixo do millón, tras a perda que houbo en xaneiro.
Por E.P. | SANTIAGO DE COMPOSTELA | 04/03/2019 | Actualizada ás 10:51
A Seguridade Social gañou de media en febreiro 4.940 afiliados en Galicia en comparación co mes anterior, un 0,5% máis que en xaneiro, segundo os datos publicados este luns polo Ministerio de Emprego. De tal forma, o total de cotizantes queda en 997.311 en Galicia, por baixo do millón, tras a perda que houbo en xaneiro respecto de decembro de 13.737 persoas, a cal aínda non se recuperou.
A nivel interanual en febreiro, rexistra un incremento de 18.822 afiliados, o que supón un 1,92% máis respecto dos cotizantes de 12 meses antes. Así, o total de 997.311 cotizantes repártese en: 766.570 persoas rexistradas no réxime xeral, mentres 209.877 son autónomos e hai 20.864 adscritos ao de mar.
Por provincias, os afiliados en febreiro respecto de xaneiro na Coruña soben en 2.577 (+0,61%) ata 428.387; seguidos do total de 347.096 en Pontevedra (1.958 máis, un 0,57%). En Ourense auméntase en 286 e consegue os 101.132, un 0,28% máis; mentres en Lugo a alza é de 119 (+0,1%) e chega a 120.696.
En taxa interanual hai unha caída de 94 cotizantes en Ourense (-0,09%), mentres o resto elévanse: Pontevedra (+2,55%), A Coruña (+2,08%) e Lugo (+1,29%).
DATOS ESTATAIS
A nivel estatal, a Seguridade Social pechou febreiro cun aumento medio de 69.172 afiliados (+0,4%), o seu menor alza neste mes desde 2016, mantendo a tendencia positiva na creación de emprego iniciada tras a crise e despois do "parón" que supuxo a finalización dos contratos de Nadal.
