Denuncian diferenzas salariais entre o persoal da Deputación de Pontevedra co mesmo traballo

O secretario comarcal de Comisións Obreiras (CC.OO.), José Ramón Piñeiro, denunciou este luns en rolda de prensa a situación de "inestabilidade e temporalidade" no persoal laboral da Deputación de Pontevedra e criticou a existencia de diferenzas salariais entre traballadores coa mesma responsabilidade.

Esta central sindical advirte de que a administración provincial ten 236 prazas da oferta de emprego público sen convocar desde o ano 2015 e alerta que a temporalidade alcanza o 48% na institución que preside Carmela Silva. Comisións Obreiras pediu un proceso selectivo "áxil e rápido".

José Ramón Piñeiro considera que a oferta de traballo da Deputación provincial é "fraudulenta" porque se realiza para desenvolver postos de traballo de superior categoría. Así, criticou ao deputado responsable de Réxime Interior da Deputación, Carlos López Font, por cobrar 70.000 euros anuais a través da súa dedicación exclusiva cando, segundo denuncia o sindicalista, a consome no Concello de Vigo.

Comisións Obreiras reclamou ao goberno provincial que os catro millóns de remanente do orzamento anual se destinen ao persoal para arranxar as desigualdades salariais.

Por último, este sindicato critica que as horas extra están a pagarse "por baixo do salario normal" e mesmo con cifras que se sitúan un 120% por baixo doutras administracións, concluíu.