Máis de 300 incidencias en Galicia pola borrasca "Laura"
Ningunha das incidencias xestionadas revestiu gravidade e a maior parte tiveron que ver coa caída de árbores e ramas.
Por Europa Press / Redacción | SANTIAGO DE COMPOSTELA | 06/03/2019 | Actualizada ás 19:59
O Centro Integrado de Atención ás Emerxencias (CIAE) 112 Galicia contabilizou un total de 340 incidencias relacionadas coa borrasca 'Laura' en pouco máis de 24 horas.
Por fortuna, segundo informou, ningunha das incidencias xestionadas revestiu gravidade e a maior parte tiveron que ver coa caída de árbores e ramas, o desprazamento de mobiliario urbano, bolsas de auga e actuacións dos servizos de emerxencias para a prevención de riscos.
Deste xeito, desde as 13,00 horas deste martes ata as 18,00 horas deste mércores, o 112 Galicia sumou un total de 142 incidencias motivadas pola caída de vexetación ás estradas e pistas, 38 pola caída de obxectos á vía, 46 accións dos equipos de emerxencias para evitar riscos e 17 por acumulación de auga na calzada, entre outros tipos de intervencións menores.
Por provincias, A Coruña (153) foi a que aglutinou o maior número das incidencias relacionadas coa borrasca, seguida de Pontevedra (138), Lugo (30) e Ourense (16).
