Por E.P. | SANTIAGO DE COMPOSTELA | 07/03/2019 | Actualizada ás 11:26
O número de execucións hipotecarias sobre vivendas de persoas físicas situouse en 280 en 2018 en Galicia, cifra un 14,6% inferior á de 2017, o que supón o seu cuarto descenso consecutivo desde 2014, cando empeza a serie histórica.
O Instituto Nacional de Estatística (INE) publica este xoves a estatística de execucións hipotecarias, que reflicte que, pola contra, as que se incrementaron o pasado ano foron as execucións hipotecarias sobre vivendas de titularidade de persoas xurídicas: un 76,1%, ata 796. En 2016 foran 271, co que este é o seu segundo aumento seguido.
No total de leiras, Galicia rexistrou 1.972 certificacións por execucións hipotecarias iniciadas e inscritas, delas 183 sobre leiras rústicas, 65 en solares, 649 noutras urbanas e 1.076 en vivendas: as 796 de persoas xurídicas e as 280 de persoas físicas e 932 de vivendas novas e 144 de segunda man. Este global representa un incremento de case o 38%. respecto ao ano anterior.
No cuarto trimestre, o total de execucións hipotecarias ascendeu a 830, delas 85 sobre leiras rústicas e as restantes, en urbanas: 415 sobre vivendas (78 de persoas físicas e 337 de persoas xurídicas), 12 sobre solares e 318 noutras urbanas. En canto ás vivendas, 384 eran de segunda man, 31 novas; 337 de persoas xurídicas e 78, de persoas físicas.
DATOS ESTATAIS
No conxunto estatal, o número de execucións hipotecarias sobre vivendas habituais situouse en 6.523 en 2018, cifra un 40,7% inferior á de 2017.
Deste xeito, as execucións hipotecarias sobre vivendas habituais encadean catro anos de retrocesos despois de que en 2017, 2016 e 2015 baixasen un 48,3%, un 30,3% e un 12,6%, respectivamente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.