En Marea insiste nunha "plataforma progresista" co PSdeG e o BNG para "non regalar senadores" ao PP
As súas candidatas pola Coruña nas primarias do partido instrumental apelan a ser "a voz da cidadanía" en Madrid
- En Marea chama a unha gran coalición de esquerdas e nacionalismo para o Senado
- O PSdeG rexeita unha coalición para o Senado con En Marea
Por E.P. | A CORUÑA | 07/03/2019 | Actualizada ás 13:31
A candidata de En Marea ao Senado pola Coruña, María Dores Candedo, reiterou ao PSdeG e ao BNG a proposta do partido instrumental de configurar unha "plataforma progresista" a esta Cámara co obxectivo de "non regalar senadores" ao PP.
Ás súas palabras sumouse, nunha rolda de prensa, a candidata ao Congreso, Ana Seijas. Preguntada acerca de se houbo conversacións con ambas formacións, Seijas lembrou que esta oferta "está feita desde hai semanas". "Esperamos que sexa ben recibida", sinalou. Así, incidiu en que o contrario "sería regalar 12 senadores ao PP". "E iso ningunha das tres formacións o desxa e non é reflexo do que vota a cidadanía", engadiu.
Pola súa banda, María Dores Candedo apelou á posiblidade de ser "maioría". Mentres, mostrouse convencida da opción de que as tres formacións traballen conxuntamente "na defensa das políticas de igualdade, dos dereitos sociais e a súa recuperación por unha xestión austericida e na defensa do autogoberno de Galicia".
"VOZ DA CIDADANÍA"
Por outra banda, sobre a súa candidatura para as eleccións xerais, Ana Seijas manifestou que o obxectivo das primarias convocadas en En Marea é "elixir as mellores candidaturas". Ademais, recalcou que a súa intención é levar "a voz da cidadanía a Madrid". "Que as decisións se tomen para Galicia desde Galicia", engadiu.
Sobre as listas destacou tamén "a igualdade real entre homes e mulleres". "As cabezas de lista de tres das catro provincias son mulleres", subliñou Ana Seijas, quen reivindicou a En Marea como un partido instrumental que "aposta polo rexeneracionismo, a ética e a democracia".
