Patronal e sindicatos do sector das ambulancias rompen as negociacións con ameaza de folga indefinida

As negociacións entre patronal e sindicatos do sector das ambulancias en relación ao novo convenio quedaron rotas na tarde deste xoves despois de que os representantes dos traballadores se levantasen da mesa de negociación ao non obter respostas positivas ás súas reclamacións.

O Consello de Relacións Laborais acolleu un novo encontro entre a Federación Galega de Empresarios de Ambulancias (Fegam) e os sindicatos do sector (CC.OO., CIG e UXT), despois de que na última reunión non se chegase a un acordo sobre a última oferta presentada pola patronal.

Segundo informou a Fegam, á súa última proposta, os sindicatos presentaron este xoves unha contraoferta económica que "implicaría unha suba do 25,8%", algo que consideran "totalmente fóra da realidade e imposible de asumir".

Esta ruptura das negociacións prodúcese cando se está levando a cabo un novo período de paros no sector das ambulancias que, se non consegue chegar a un acordo para a firma do novo convenio, irá á folga indefinida a partir do 20 deste mes.

Os empresarios aseguraron que os traballadores "ameazan con recrudecer a folga" e que, "desde o primeiro día de negociación non cesaron as sabotaxes a vehículos, con pintadas e picadas de rodas".

Aínda así, a patronal reitera que se mantén a proposta presentada aos sindicatos no último encontro de negociación, que recolle un "importante incremento salarial" e "melloras sociais, que inclúen moitas das demandas dos traballadores".

O texto entregado aos representantes sindicais ofrece aos traballadores un aumento do 4% do salario a partir de novembro deste ano, un aumento doutro 3% a partir de novembro de 2020, un incremento adicional do 1% en xaneiro de 2021 e xaneiro de 2022, a terceira paga extra, que suporá un aumento do 8'5% do salario, prorrateada en dous anos (2021 e 2022), e unha paga lineal de 150 euros para todos os traballadores a percibir nos meses de novembro de 2020, 2021 e 2022.

Así mesmo, os traballadores percibirán o mesmo salario en vacacións que o resto do ano, incluíndo complementos, entre outras melloras sociais, explicou a patronal. Con iso, explica Fegam, e en cómputos globais, "os traballadores do transporte sanitario da comunidade galega incrementarían o seu salario en cinco anos en máis dun 18%".

Con todo, os traballadores esixen que a oferta salarial sexa máis importante e, sobre todo, reclaman que as melloras se implanten con inmediatez e que non se apracen ata 2020.