A Consellería de Medio Ambiente destaca a contribución das mulleres no agro pola igualdade "real"
Por E.P. | SANTIAGO DE COMPOSTELA | 08/03/2019 | Actualizada ás 17:56
A conselleira de Medio Ambiente, Territorio e Vivenda, Ángeles Vázquez, destacou este venres o papel "chave" e "dinamizador" das mulleres no agro galego e a súa contribución para conseguir unha igualdade "real".
Nun acto en Melide (A Coruña) con motivo do Día Internacional da Muller, a conselleira valorou as "múltiples funcións" que desempeñan as mulleres no rural, xa que actúan como "un auténtico eixo dinamizador e un elemento estratéxico para o crecemento económico" destas zonas.
Neste contexto, Vázquez destacou o peso "cada vez maior" das mulleres neste ámbito e nas iniciativas empresariais vinculadas ao campo, posto que --asegurou-- o 54 por cento dos negocios que neste momento se poñen en marcha no rural son promovidos por emprendedoras e máis da metade das explotacións agrarias en Galicia son de titularidade feminina.
Así as cousas, a conselleira de Medio Ambiente garantiu o apoio do Goberno galego a través de políticas de fomento de conciliación da vida laboral e familiar, do emprendimiento feminino e da modernización tecnolóxica das explotacións.
No acto tamén participou a secretaria xeral de Igualdade, Susana López Abella, quen apuntou que Galicia "non se entendería sen o seu rural e sen as súas mulleres". "Desexo e quero que os 365 días do ano sexan 365 días pola igualdade", destacou.
