Marea Atlántica e Compostela Aberta non participarán "activamente" nas Xerais se non hai "unidade"
Podemos, IU e Anova levan tempo traballando para sacar unha nova coalición tras as diferenzas xurdidas con En Marea.
Por Europa Press / Redacción | SANTIAGO DE COMPOSTELA | 12/03/2019 | Actualizada ás 12:17
Marea Atlántica súmase a Compostela Aberta e anuncia que se absterá de participar "activamente" na campaña das eleccións xerais do próximo 28 de abril no caso de que non se produza a "unidade" de "todo" o espazo político.
Así o dixo o alcalde da Coruña, Xulio Ferreiro, tras facer un novo chamamento a En Marea para "sumarse" á coalición na que avanzan Anova, Esquerda Unida e Podemos para os comicios, sabedor de que a división xa está consumada.
Ferreiro repite case o mesmo que dixo Martiño Noriega este luns, asegurando que Compostela Aberta, como organización, "manterase á marxe" do proceso das eleccións xerais e deixará liberdade aos seus integrantes "para participar onde alí consideren". "Compostela Aberta está á marxe do debate e da situación que se está dando a nivel galego", dicía en referencia ás negociacións entre Podemos, Esquerda Unida e Anova coa En Marea de Luís Villares para concorrer xuntos ás eleccións.
Preguntado polas negociacións para conformar unha candidatura nova, á marxe de En Marea, que levaría o nome de Galicia en Común, Ferreiro afirmou descoñecer a situación actual, xa que el non está a participar nelas. "Sei máis ou menos o mesmo que sabedes vós, que se está avanzando nesas negociacións para ter unha coalición entre os dous partidos", indicou aos xornalistas.
En declaracións aos medios de comunicación este martes nun acto na Coruña, insistiu en que, na súa opinión, "o máis positivo para todos" sería lograr "unha candidatura completa" de "todo" o espazo político.
