Un lugués acusado de abusar sexualmente da súa filla de catro anos: "Non toquei a nena para nada"
Fiscalía pide o sobresemento do caso, malia que a pediatra da cativa testificou que a vítima presentaba "lesións na zona xenital"
Por Europa Press / Redacción | SANTIAGO DE COMPOSTELA | 12/03/2019 | Actualizada ás 12:37
Un veciño do Saviñao (Lugo), para quen a acusación particular pide 12 anos de prisión por abuso sexual á súa filla cando tiña catro anos, negou os feitos no xuízo celebrado este martes na Audiencia Provincial de Lugo. Fiscalía pide o sobresemento do caso.
A acusación particular, que representa á nai da nena, reclamou nas súas conclusións provisionais que se condene a este veciño dunha aldea do Saviñao por un delito continuado de abuso sexual. En cambio, Fiscalía interesa o sobresemento das actuacións ao "non resultar debidamente xustificada a perpetración do delito conforme ao artigo 641.1 da Lei de Enjuiciamiento Criminal". A defensa do procesado pide a libre absolución.
Os feitos xulgados remóntanse a abril de 2014, nunha fin de semana no que a custodia lle correspondía ao home, que se atopaba na casa dos avós. O pai da suposta vítima, M.A.C.V., negou os feitos. "Non toquei a nena para nada", defendeu o home, quen afirma que a relación coa súa filla "era boa e fluída", aínda que nese momento xa estaba separado da nai. "Non cometín ningún tipo de abuso", asevera.
TESTEMUÑO DE PEDIATRA
No xuízo declarou en calidade de testemuña unha doutora que atendeu a nena en maio de 2014. Ela constatou "evidencias físicas" de abuso sobre a nena. Así, asegurou que sufría "lesións na zona xenital" que rexeitou que puidesen ser ocasionadas de forma "accidental". Incluso dixo que a pequena se comportaba como unha "zombi".
A excuñada do presunto agresor relatou que a nena lle contou de forma "espontánea" que o seu pai "a tocara aí abaixo". Logo dese comentario, a tía da cativa quixo indagar máis e preguntoulle á nena que pasaba, porque a notaba "rara".
