Os apicultores galegos buscan como adaptarse ao cambio climático e combater a velutina

A Asociación Sectorial Forestal Galega (Asefoga) informou este martes en Ourense das medidas de adaptación ao cambio climático do sector apícola galego derivadas do proxecto 'Apicambio' levado a cabo en Galicia e Estremadura co apoio da Fundación Biodiversidade, do Ministerio para a Transición Ecolóxica.

'Apicambio' ten como obxectivo principal "levantar a mirada dos problemas inmediatos da apicultura e centrarse na problemática que está a supor xa, sen ter que esperar ao futuro, o cambio climático", explicou o secretario xeral de Asefoga, Jacobo Feijóo. O traballo, realizado a partir dunha serie de entrevistas a profesionais da apicultura, recolle nas súas conclusións medidas de adaptación e de mitigación fronte ao cambio climático.

A modo de introdución, Jacobo Feijóo quixo destacar que "Ourense conta con case un terzo dos apicultores profesionais de toda Galicia, o que supón uns 1.000 profesionais censados e ao redor de 70.000 colmeas cunha produción moi variable en función dos factores climáticos".

O cambio climático afecta á apicultura, segundo explicou o apicultor ourensán Xurxo Domínguez. "Un 60% dos apicultores enquisados xa percibe o problema do cambio climático como algo actual e un 95% considera que vai ser un problema grave", resaltou.

Así mesmo, incidiu na problemática á que se enfrontan os apicultores. "Percibimos o desprazamento de estacións, a irregularidade das choivas, secas, desfasamento das floracións e enfrontámonos ao novo problema da velutina", sinalou. O cal vai derivar en "menos comida para as abellas, menor cantidade de pole, vai contribuír á debilitación da colmea e vai aumentar a incidencia de enfermidades".

En base a todos estes datos, idearon unha serie de medidas de adaptación para o sector apícola contra o cambio climático que deben ser implementadas polas administracións e as organizacións apícolas e, doutra banda, polos profesionais do sector.

En canto ao que incumbe ás administracións e organizacións apícolas, enumerou iniciativas que se deben levar a cabo, tales como "preservar o patrimonio xenético, incidir na formación dos apicultores, achegar incentivos fiscais para a apicultura, e promocionar o mel e fomentar o seu consumo desde idades temperás, sen esquecerse da importancia das subvencións".

ACCIÓNS

Tamén se referiron ás medidas que deben implantar os apicultores e, dun modo especial os profesionais. Entre elas, "a diversificación de produtos da colmea para compensar a perda de mel, entre os que destacan o pole, propóleo, raíñas".

Outra das accións que poden establecer os apicultores é a "mobilidade", é dicir, "pequenos desprazamentos entre os colmenares da mesma persoa buscando facer coincidir a explosión das abellas con esas floracións que van variar no tempo", indicaron.

Outra das grandes liñas de acción fronte ao cambio climático é a intensificación. O emprego deste termo equivale a "a alimentación artificial das colmeas, a reposición de colonias e a substitución sistemática de raíñas", expuxeron. Con todo isto, "teremos sempre as colmeas máis óptimas para a produción", explicou Xurxo Domínguez.

En último lugar, o apicultor David Sousa detívose a criticar o feito de que "en toda Galicia se suspendeu a investigación sobre a velutina". Ao tratarse dunha praga que pon en xaque a economía en moitos sectores, "parece ridículo que exista cero investigación neste aspecto", abundou. Pola súa banda, "a Xunta está a financiar medidas pouco efectivas e non consensuadas pola comunidade científica como, por exemplo, o trampeo masivo", concluíu.