Médicos de Atención Primaria da Coruña deciden este xoves o seu apoio á folga proposta para abril
A Coordinadora Galega de Atención Primaria di que é unha convocatoria que afectaría a todo o persoal entre eles enfermeiras, matronas ou fisioterapeutas.
Por Europa Press / Redacción | A CORUÑA | 13/03/2019 | Actualizada ás 17:35
Médicos de Atención Primaria da Coruña decidirán este xoves se apoian a proposta da Coordinadora Galega dunha convocatoria de folga xeral na Atención Primaria de Galicia para os días 9, 10 e 11 de abril.
Así o confirmou o portavoz da coordinadora coruñesa, Ramón Beiras, que confiou en que haberá un apoio maioritario a secundar a folga. No entanto, dixo que esta cuestión se decidirá nunha reunión que manterán, a partir das 20,00 horas, os profesionais que integran a citada coordinadora.
Sobre a folga, subliñou que, aínda que os médicos son os "máis mobilizados", trátase dunha convocatoria que afectaría a todo o persoal de Atención Primaria, entre eles enfermeiras, matronas ou fisioterapeutas.
Entre as iniciativas que baralla tamén a Coordinadora Galega de Atención Primaria, está a recollida de firmas para solicitar a dimisión dos xefes de servizo doutras áreas, non coller novos residentes, avaliar as condicións actuais das unidades docentes ou levar a cabo outros actos de protesta.
