Por Europa Press / Redacción | SANTIAGO DE COMPOSTELA | 13/03/2019 | Actualizada ás 18:02
A Federación Galega de Municipios e Provincias (Fegamp) sumouse ao protocolo do Consello de Constas para a prevención da corrupción, que inclúe medidas como o fomento de instrumentos de prevención e a formación dos empregados públicos.
O presidente da Fegamp, Alfredo García, e o conselleiro maior de Contas, José Antonio Redondo, asinaron este mércores o protocolo, un día despois de que o catro deputacións galegas rubricasen este acordo.
Nun comunicado remitido aos medios, Contas lembrou que dentro das súas novas competencias en materia de prevención da corrupción prevese a promoción de instrumentos de colaboración cos órganos da administración autonómica con atribucións en transparencia, co obxectivo de promover mecanismos de autorregulación na implantación, control e seguimento dos plans de prevención de riscos da corrupción no sector público autonómico e local de Galicia.
Pola súa banda, indicou que a Fegamp asumiu, no seu plan de transparencia e bo goberno para entidades locais, o compromiso firme de adoptar políticas de transparencia que complementen as previsións da lexislación estatal na materia e que sirvan como instrumento que facilite a aplicación das súas esixencias para as entidades locais.
Ademais, comprométese a impulsar políticas de integridade e de prevención da corrupción como elementos estratéxicos para unha xestión pública responsable das corporacións. En concreto, o convenio contempla a promoción de políticas de integridade, o fomento de instrumentos de prevención de riscos de corrupción, a avaliación dos sistemas de prevención, a elaboración de modelos tipo de plans de prevención, así como a formación dos empregados.
"LIBRO-GUÍA"
Pola súa banda, o presidente da Fegamp valorou positivamente a colaboración entre institucións en materia de prevención. "Máis que ser unha norma sen máis, este protocolo ten a vontade de facer un libro-guía que lle permita aos concellos saber exactamente que pasos teñen que dar os traballadores públicos para que cando fagan calquera tipo de contrato, os controis se sigan con rigor".
Ademais, Alfredo García avanzou que se porá en marcha un grupo de traballo coas deputacións para traballar nesta materia. "Queremos xuntarnos coas deputacións para, entre as dúas administracións, crear ese documento que sexa a folla de ruta para ir mellorando paso a paso en materia de prevención de riscos de corrupción".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.