O Museo de Belas Artes da Coruña amplía a súa colección con obras do Reina Sofía e do Prado
Tamén aportan obras o Círculo de Bellas Artes de Madrid e coleccionistas particulares.
Por Europa Press / Redacción | A CORUÑA | 14/03/2019 | Actualizada ás 18:05
O Museo de Belas Artes da Coruña ampliou a súa colección con novas pezas procedentes do Museo Nacional del Prado, do Museo Nacional Centro de Arte Reina Sofía e doutras institucións como o Círculo de Bellas Artes de Madrid ou préstamos de particulares.
En total, incorporaranse á exposición do museo coruñés 39 obras de distintos autores como Urbano Lugrís, Julia Minguillón, Lago Ribeira, Xaime Quesada, Juan Luís López, Isaac Díaz Pardo, Elena Gago, Manuel Molezún, Alberto Datas, Román Navarro ou Isidoro Brocos. A maior parte destes novos fondos proceden do Museo del Prado, que cede 23 obras do pintor Fernández Álvarez de Sotomayor.
Entre os novos fondos, destacan dúas cerámicas de Pablo Picasso, adquiridas polo museo á Fundación Camilo José Cela, xunto cunha obra de Urbano Lugrís.
Segundo os responsables do museo, estas novas pezas supoñen "pola súa calidade e representatividade, un enriquecemento da colección permanente xa que permite mostrar un renovado discurso expositivo e unha reorganización de espazos que axudará a comprender mellor o mundo de finais do século XIX e principios do XX".
