Axentes da Garda Civil fórmanse para facer fronte ao crecemento de delitos telemáticos
Durante o 2018 investigáronse preto de 400 casos deste tipo en Galicia
Por E.P. | SANTIAGO DE COMPOSTELA | 16/03/2019 | Actualizada ás 18:40
A Garda Civil investigou o ano pasado a un total de 377 persoas por delitos telemáticos en Galicia, polo que organizou na Academia Galega de Seguridade Pública un curso de Fraude Electrónica e Estafas en Internet para formar os seus efectivos galegos neste ámbito.
Segundo sinalou a Garda Civil nun comunicado, os delitos telemáticos atópanse en "pleno crecemento" e trátanse dunha forma de delinquir "bastante cómoda para os criminais". Así, dos 377 investigados, "unha parte importante" foron detidos.
En canto ao curso de Fraude Electrónica, a formación contou co fiscal de Criminalidade Informática da Coruña, Luís Vázquez Seco; o letrado do bufete Perseus&RC asociados especialista en delitos informáticos, Luís Jrado; o sarxento de Estafas Telemáticas da Compañía da Garda Civil Alberto González, e o axente da comandancia de Ourense Roberto Valente.
RECOMENDACIÓNS
Neste sentido, a Garda Civil sinalou, entre outras recomendacións, a importancia de utilizar "a lóxica e o sentido común" á hora de usar Internet, e ter actualizado nos equipos todos os programas que sexan utilizados na rede, ademais dos sistemas operativos e os antivirus.
Así, lembrou que na rede "non todo o mundo é quen di ser", e subliñou a importancia de utilizar contrasinais "robustos" con máis de oito caracteres alfanuméricos combinados con algún símbolo. Así mesmo, insistiu en protexer a privacidade das persoas en Internet "evitando facer públicos datos innecesarios" e "ser cautos" á hora de realizar compras 'en liña' e sempre facelas desde sitios seguros, "evitando anuncios trampa".
