Os encoros galegos perden 38 hectómetros cúbicos de auga esta semana
Sitúanse ao 68,55% da súa capacidade.
Por E.P. | SANTIAGO DE COMPOSTELA | 19/03/2019 | Actualizada ás 14:20
Os embales galegos perderon na última semana 38 hectómetros cúbicos de auga, e volven á dinámica de descenso despois dunha semana na que recuperaran 135. Así, as concas de Galicia sitúanse ao 68,55% da súa capacidade, un punto menos que fai sete días.
Segundo os datos que este martes fixo públicos o Ministerio para a Transición Ecolóxica, Galicia ten 2.546 hectómetros cúbicos de auga embalsada, fronte aos 2.584 do anterior rexistro.
En canto á desagregación por encoros, o de Miño-Sil sitúase ao 67,19% da súa capacidade (fronte ao 68,2% anterior), tras perder 30 hectómetros cúbicos e quedar en 2.036. Os datos son peores que os rexistrados o pasado ano (2.370) e que a media da última década (2.306).
Doutra banda, na conca Galicia Costa as reservas caeron en 8 hectómetros e sitúanse en 510, o que supón estar ao 74,56% da súa capacidade. O volume de auga acumulada é algo inferior ao da pasada semana (518 hectómetros, 75,7% de capacidade), e a diferenza é superior se se compara cos rexistros de 2018 (611) ou a media histórica do dez anos anteriores (528 hectómetros)
No conxunto do país, a reserva hidráulica situouse no 58,5% da súa capacidade, con 32.845 hectómetros cúbicos acumulados. Son 91 menos que a semana pasada e 884 menos que hai un ano.
