'ApuntasTech', un concurso que promove a igualdade de xénero no sector da tecnoloxía
Conta con catro categorías: dúas para estudantes de primaria, secundaria e bacharelato e outras dúas para adultos
Por E.P. | SANTIAGO DE COMPOSTELA | 21/03/2019 | Actualizada ás 15:01
A Secretaría de Igualdade da Xunta, o Centro de Supercomputación de Galicia (Cesga) e o Colexio Profesional de Enxeñaría en Informática de Galicia (Cpeig) lanzan 'ApuntasTech', o primeiro concurso que busca promover as vocacións tecnolóxicas femininas e acadar unha presenza igualitaria entre homes e mulleres no sector.
Segundo informa o Cpeig nun comunicado, o concurso pretende, de forma lúdica e aberta, escoitar a todas as partes implicadas para poder reunir as mellores propostas e xerar un catálogo dinámico para poder traballar as tecnoloxías de forma amena, principalmente nas aulas, pero tamén fóra delas en actividades extraescolares ou en familia.
O concurso busca propostas divertidas e innovadoras que fagan uso do TIC de forma creativa e transversal, tanto con software como hardware, onde o uso da tecnoloxía non sexa só o obxectivo final, senón un medio. Tamén se busca que sexa posible levalas a cabo no contexto escolar. Posteriormente, elaborarase unha recompilación das mellores propostas e publicarase con licenza aberta para que se poidan descargar na páxina web do concurso, así como en diferentes repositorios de materiais educativos en liña.
CATRO CATEGORÍAS
O concurso conta con catro categorías: dúas para estudantes de primaria, secundaria e bacharelato e outras dúas para adultos (centros educativos e outros centros ou institucións). O prazo das propostas estará aberto ata o 15 de abril e cada categoría conta cun premio principal e dous accésits. A información sobre o concurso pode atoparse na páxina web de ICT-Go-Girls.
O concurso enmárcase nas actividades para celebrar o VII 'Día das Mozas no TIC' (International Girls in ICT Day) o próximo 25 de abril, polo que será ese día cando se fará pública a decisión do xurado do concurso. O acto terá lugar no Cesga e será retransmitido en directo a través de Internet.
A Secretaría de Igualdade e o Cesga, promotor e coordinador do proxecto europeo ICT-Go-Girls para a promoción do emprendemento a través do TIC entre mulleres estudantes de educación secundaria, impulsa e colabora desde 2013 en diferentes iniciativas para a difusión do TIC. De forma especial, busca conseguir que as mulleres alcancen a presenza igualitaria no sector.
