O BNG destaca que a maioría das súas listas estarán lideradas por independentes

A metade das listas que o BNG presentará ás próximas eleccións municipais de maio estará integrada por persoas sen militancia na formación nacionalista, que prevé presentar máis candidaturas que as 259 listas coas que concorreu en maio de 2015. 

No BNG atribúen esta situación ao novo "ambiente" en torno ao proxecto do Bloque despois de varios anos "difíciles" tras a asemblea que supuxo a súa maior escisión na fronte nacionalista (Amio) e nos que irromperon Alternativa Galega de Esquerda (AGE) --primeiro-- e as mareas --despois--.

As mesmas fontes explicaron a Europa Press que fundamentalmente se trata de incorporacións "novas" que veñen "sen mochila", aínda que na confección de listas tamén para as xerais hai nomes xa coñecidos para o nacionalismo como o son o que fora estreito colaborador de Alfredo Suárez Canal no medio Rural, Xosé Carballido, ou Iago Tabarés, que será o número un ao Congreso por Ourense para o 28A.

Ademais, o actor Miguel Pernas, que foi un dos promotores do manifesto 'Somos maioría' coa intención de lograr unidade nas municipais de 2015 e que entón aglutinou a alcaldes da órbita nacionalista (Anova, Bloque e Compromiso por Galicia), incorporouse agora ao proxecto do BNG.

CRÍTICAS

Estes datos aportados polo BNG foron previamente filtrados a La Voz que abría hoxe a edición de Política baixo o título "Militantes de Anova desertan y se pasan al Bloque". Un titular que causou un forte impacto entre veteranos nacionalistas, algúns en activo e outros xa fóra da política, pero co denominador común de ter militado no Bloque que cren que ten coma fin "erosionar a unidade do nacionalismo". 

Algúns veteranos dirixentes nacionalistas apuntan a GC o momento no que chega este tipo de noticias. "Baixas de militantes de Anova xa se levaban dando desde hai tempo", indican. "E son moi poucos os que, supostamente, formalizaron a súa alta no BNG", engaden. "Primeiro dinamitaron En Marea e agora queren dinamitar unha posible unión do nacionalismo para seguir mangoneando na UPG", engade.

Consultadas fontes do BNG sobre a 'repesca' de nomes que proceden de formacións como Anova, xurdida dunha das escisións do BNG en 2012, aseguraron que hai "pequenas pingas a nivel local", como o caso de dous edís de Cedeira, e persoas que se están "implicando" no proxecto do BNG.

Con todo o BNG insiste en que "hai máis de cen" solicitudes de información sobre como afiliarse ao BNG e que a formación ten pendente "resolver", segundo as mesmas fontes, nos últimos tempos outras caras coñecidas como a artista Faia Díaz (do grupo De Vacas) e o escritor Suso de Toro deron o paso de afiliarse, como anunciaron nas súas contas persoais de redes sociais.

Neste escenario, o Bloque xa conta con ao redor de 4.500 candidatos confirmados para as 250 candidaturas que xa teñen pechadas. A previsión é superar as 259 de 2015 e aproximar máis o número aos 313 concellos cos que conta Galicia, pero sen recorrer a "paracaidismos".

CASTRELO DE MIÑO

Quen non repetirá é o alcalde de Castrelo de Miño, Xurxo Rodríguez, que desde 2007 foi rexedor dese municipio da comarca do Ribeiro, tres mandatos dos cales os últimos dous foino con maioría absoluta. Precisamente agora reincorporarase ao seu posto de traballo no consello regulador da denominación de orixe Ribeiro e, tal e como confirmou a Europa Press, permanecerá traballando no BNG local.

"Despois de 12 anos é o momento de que se produza unha substitución no BNG de Castrelo e sexa outra persoa a que continúe facendo este camiño de substitucións. Isto non é ningunha novidade no BNG de Castrelo, ou mesmo recibino en 2007 dos anteriores candidatos e sempre fun consciente de que chegamos ao goberno naquel momento grazas ao traballo realizado anteriormente por eles e por todo o BNG desde 1995 na oposición municipal", destacou este xoves, día en que deu a coñecer publicamente a noticia, e no que fixo un balance "positivo".

REGRESO DE TABARÉS

Doutra banda, unha das caras máis coñecidas que volve á primeira liña política tras varios anos fóra dela tras o seu paso polo Parlamento galego é o ourensán Iago Tabarés, que deixou de militar tras Amio. Aínda non se volveu afiliar, aínda que xa o levaba sopesando un tempo antes de que o propio BNG lle fixese a proposta de regresar.

Será o cabeza de lista da formación nacionalista por Ourense para o Congreso dos Deputados. "Paréceme que estamos nun momento no que hai que comprometerse, nunha situación mesmo de menosprezo á actividade política, que a min me parece moi digna e moi útil", manifestou.

Tamén o contexto de "retroceso de dereitos, incluídos os dereitos sociais máis básicos" e os "ataques e persecución" contra os símbolos propios de forma "inxustificada" pesaron na súa decisión, xunto con que a "provincia de Ourense está esquecida, á cola de todos os indicadores".

Tabarés manifestou que o Bloque "foi e é" a súa "casa" e "demostrou, co tempo, que hai outras casas, pero que é a única organización que defende os intereses de Galicia por enriba de todo".

Aínda que neste momento non é afiliado do BNG, subliñou que o do BNG "é o proxecto máis claro" nacionalista, "con independencia doutros que respecta profundamente, e moito máis ás persoas que están noutras opcións". Pero, agregou: "Temos que aglutinarnos e creo que o elemento nuclear debe de ser o BNG".

"AS PORTAS ESTÁN ABERTAS"

De feito, Tabarés sostén que "si" hai espazo no BNG como proxecto común. "E como comigo houbo ese ofrecemento, imaxino e espero e desexo que tamén" ocorra con outras persoas, algo que, "particularmente", lle "gustaría", porque o ve "necesario".

"Creo que as portas do BNG están abertas e sería bo que confluísemos as persoas que pensamos que Galicia debe de estar por enriba de todo", incidiu Iago Tabarés, quen aposta porque "quen defendan sen subordinación a organizacións estatais deberían traballar xuntos polo ben de Galicia".

Insistiu en que, por "elegancia", non se pronunciaría sobre outras organizacións, pero si mostrou o seu desexo porque "outras persoas nacionalistas traballen xuntas", inclusive "electoralmente".

Así, e aínda que non se considera "símbolo" da volta a casa de militantes do BNG que se puidesen afastar do proxecto tras Amio, manifestou que se o seu é "un paso que pode servir para animar a alguén máis", pois "fenomenal". "Hai moitas persoas que fan esa reflexión, que é que temos que xuntarnos en torno ao BNG; se isto pode servir para que alguén reconsidere o mesmo paso que din eu, fenomenal. Son un máis dos que fixen o percorrido de volta", sentenciou.