Medio Rural prohibe desde este luns as queimas agrícolas e forestais polas condicións meteorolóxicas

Por E.P. | SANTIAGO DE COMPOSTELA | 24/03/2019 | Actualizada ás 15:07

Comparte esta noticia

A partir das 00,00 horas deste luns e ata novo aviso quedan prohibidas as queimas de restos agrícolas e forestais en Galicia debido ás condicións meteorolóxicas que poderían dificultar o seu control.

Así o informa a Consellería do Medio Rural nun comunicado, que especifica que quedarán tamén en suspenso os permisos xa concedidos, xa que as comunicacións e autorizacións de queima carecerán de validez desde o comezo da prohibición. A decisión foi tomada tras avaliar a evolución do tempo e analizar os diferentes indicadores técnicos que inciden no risco de incendio en tempada de alto risco.

Tamén se tivo en conta a normativa --Decreto 105/2006 polo que se regulan as medidas relativas á prevención de riscos forestais, a protección dos asentamentos no medio rural e a regulación de aproveitamentos e repoboacións forestais-- que prohibe as queimas cando as condicións meteorolóxicas poidan dificultar o seu control.

Así mesmo, a Xunta pide a colaboración da cidadanía para que extreme as precaucións e denuncie calquera actividade delituosa incendiaria da que teña coñecemento, xa que desde este domingo e ata novo aviso non está permitido o uso do lume para ningunha actividade agrícola e forestal.

Ademais, a Consellería lembra que se atopa a disposición da cidadanía o número de teléfono gratuíto 085, ao que se debe chamar en caso de detectar algún incendio forestal.

Queima forestal
Queima forestal

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta