A aplicación Android para conxugar os verbos galegos
ConxuGalego é un software libre para dispositivos con Android que permite conxugar calquera verbo na nosa lingua.
Por Galicia Confidencial | Santiago | 17/11/2011 | Actualizada ás 13:13
O enxeñeiro informático Xurxo Méndez e a deseñadora Sabela Barreiro lanzaron esta semana ConxuGalego, unha aplicación para dispositivos co sistema operativo Android que permite introducir o infinitivo de calquera verbo en galego, sexa regular ou irregular, e obter a conxugación deste en tódalas súas formas verbais.
A aplicación é sinxela: un cadro de busca onde introducir un infinitivo e unha pantalla onde se amosan todos os tempos verbais conxugados. O conxugador que funciona por detrás é unha modificación do software libre Conshuga do Departamento de Gramática da Universidade de Santiago de Compostela.
O conxugador funciona para móbiles con Android 2.0 en adiante e está dispoñible no Android Market de balde.
Todas as novidades deste proxecto 100% galego poden ser seguidas a través da súa conta en Twitter: @ConxuGalego.
