A candidata de Ciudadanos Beatriz Piñeiro di que a súa forza política asume o compromiso co rural
Entre a batería de solucións que propón no seu programa Ciudadanos hai unha rebaixa do 60% do IRPF nas zonas menos poboadas e a creación dunha tarifa plana de 30 euros para mulleres autónomas do rural.
Por E.P. | SANTIAGO DE COMPOSTELA | 31/03/2019 | Actualizada ás 18:51
A candidata de Ciudadanos ao Congreso por Pontevedra Beatriz Piñeiro, asegurou este domingo que "o rural galego esixe recoñecemento e respecto" polo que o seu partido "asume o compromiso". Neste sentido, Piñeiro reuniuse coa dona dunha explotación gandeira en Filgueira, na localidade pontevedresa de Lalín, onde "puido coñecer os seus problemas de primeira man".
"Pasamos un día na explotación de Pilar. Non viñemos facer o seu gran traballo, viñemos escoitar as súas múltiples preocupacións", afirmou a candidata laranxa, segundo recolle Ciudadanos nun comunicado. Durante a visita, a dona da explotación puxo sobre a mesa problemas como os baixos prezos, as trabas administrativas ou a falta de servizos.
Así, Piñeiro sinalou que para Ciudadanos o rural galego é "un asunto primordial" e por iso "non se pode mirar cara a outro lado". "Por todos os que con moito esforzo e moito traballo sacan adiante pequenas e medianas explotacións familiares e que merecen o noso recoñecemento e o noso respecto", subliñou.
Beatriz Piñeiro explicou, ademais, que entre a batería de solucións que propón no seu programa Ciudadanos, e que presentará no Congreso dos Deputados, hai unha rebaixa do 60% do IRPF nas zonas menos poboadas, a creación dunha tarifa plana de 30 euros para mulleres autónomas do rural ou a supresión do imposto de sucesións das explotacións agrarias.
