Hernández anuncia man dura policial no centro de Santiago se sae elixido alcalde

O candidato do PP de Santiago para as eleccións municipais, Agustín Hernández, comprometeuse a aprobar durante os tres primeiros meses de mandato, no caso de saír elixido os comicios, un "plan de choque" para o Centro histórico da cidade que permita atallar todos os problemas de "atascos", de "convivencia" e de "planificación" que o están levando "á degradación" e ao "abandono".

Así o sinalou en rolda de prensa, na que detallou os distintos puntos e áreas que abordará este "compromiso capital" con "medidas claras" e co que o PP pretende "recuperar a actividade" da cidade, comezando o reforzo da oficina de rehabilitación municipal.

O plan incluirá unha reformulación do sistema de acceso e control de vehículos autorizados, mediante un sistema de control centralizado que permita obter información "a tempo real" sobre as horas de entrada e saída, e así evitar as "fraudes" que se producen e a entrada sen permiso de coches que provocan "atascos" na zona.

O PP abordará tamén a implantación da fibra óptica a través dun catálogo de solucións técnicas co visto e prace da Dirección Xeral de Patrimonio, que inclúa os trazados a través de cornixas, ou pola rede de saneamento, entre outros. Así mesmo, solicitarase ao Estado o recoñecemento do Casco Antigo como "zona branca NGA" para poder optar a axudas que permitan avanzar nesta tarefa.

DESPREGAMENTO POLICIAL

En materia de convivencia, reforzarase o despregamento de axentes da Policía Local e a súa coordinación coa Policía Nacional, optimizarase o uso de cámaras en puntos conflitivos e aprobarase unha ordenanza de convivencia, a disposición dos municipios na FEMP, que habilitará ás forzas e corpos do Estado ante situacións de desorde pública.

Doutra banda, potenciarase as oficinas municipais para garantir unha resposta rápida ante a lentitude de autorizacións e permisos urbanísticos do Concello; revisarase a planificación da zona e revisarase o plan de xestión aprobado por Compostela Aberta, co fin de redactar un plan estratéxico que analice, diagnostique e planifique mellor os servizos e a rede de abastecemento.

Finalmente, anunciou que se mellorará o sistema de recollida de lixo e a limpeza da cidade, con vehículos renovados e impulsaranse iniciativas para liquidar o abandono do comercio no Centro histórico, como axudas e accións de discriminación positiva.

Agustín Hernández.