A oposición esixe o cese da valedora tras confirmar o TS que enchufou á sobriña de Fraga

En Marea, PSdeG e BNG esixiron o cesamento da valedora do Pobo, Milagros Otero, despois de que o Tribunal Supremo rexeitase o recurso interposto pola institución ao fallo que anulou o nomeamento de María Puy Fraga, sobriña do expresidente Manuel Fraga e irmá do portavoz parlamentario do PPdeG, para un posto na defensoría galega, do que foi apartada pola propia defensora tras coñecerse o primeiro fallo xudicial.

Deste xeito, o portavoz de En Marea, Luís Villares, lembrou que a súa formación xa pediu o cesamento da valedora cando transcendeu o asunto e sinalou que o propio presidente da Xunta, Alberto Núñez Feijóo, asegurou que esperaría a "que a decisión fose firme" para "tomar nota". Ante iso e unha vez coñecido o fallo do Tribunal Supremo, o portavoz de En Marea volveu a reiterar a petición de cesamento. "Queremos que Feijóo cumpra coa súa palabra. Non pode haber nepotismo nas institucións", manifestou Luís Villares.

E é que, preguntado respecto diso durante a súa participación nun acto en Vigo, o maxistrado lucense en excedencia censurou que "a persoa encargada de facer valer os dereitos dos cidadáns ante as administracións sexa a primeira que os vulnera". Por iso, avanzou que, de non producirse a dimisión, En Marea volverá esixir a súa cense no pleno da Cámara.

A valedora do Pobo, Milagros Otero. VALEDOR DO POBO - Archivo

REACCIÓNS DA CÁMARA

Nesta liña, en declaracións aos medios, a viceportavoz parlamentaria do PSdeG, Patricia Vilán, urxiu ao presidente da Xunta que retire á valedora do Pobo ante o fallo que sinala "arbitrariedade" e "desviación de poder" por prepararlle un posto á "irmá do portavoz do PP. A deputada socialista reivindicou o cesamento de Otero "o máis pronto posible" e avanzou que, de non producirse, o PSdeG adoptará "as medidas que considere oportunas" para "velar polo prestixio dunha institución" que "ten que estar por encima dos intereses do PP".

Tamén urxiu o cesamento "inmediato" de Milagros Otero o BNG, cuxa deputada Noa Presas acusou ao presidente da Xunta, Alberto Núñez Feijóo, de manter unha actitude "nepotista e caciquil" ao favorecer o "enchufismo" dunha persoa vinculada ao PP.  Apuntou ademais a Feijóo como o "principal responsable" na contratación de María Puy Fraga e asegurou que o nomeamento de Milagros Otero é unha consecuencia do "pacto" entre PP e PSOE para repartirse institucións como o Consello de Contas, o Consello da CRTVG ou o propio Valedor do Pobo.