Por E.P. | SANTIAGO DE COMPOSTELA | 04/04/2019 | Actualizada ás 12:33
Unha publicación, publicada da man do Consorcio de Santiago e Alvarellos Editora, reúne por primeira vez a obra xornalística do intelectual galego Victoriano García Martí (1881-1966). 'Polos camiños do século XX. Obra xornalística esquecida (1914-1963)' é unha recompilación de artigos do escritor realizada pola doutora europea en Teoría da Literatura e Literatura Comparada Arantxa Fontes Ríos, profesora da USC.
García Martí foi un avanzado ao seu tempo e nestes artigos abórdanse temas como a defensa da liberdade dos pobos, o feminismo, o valor do turismo ou a reordenación dos órganos culturais. Este pensador europeísta e herdeiro dos fitos do Rexurdimento é "unha figura lamentablemente esquecida pola historia da literatura e do pensamento", apunta o Consorcio.
Amigo persoal de Valle-Inclán, reivindicou o legado de Rosalía de Castro (en 1944 publicou a primeira edición das súas 'Obras completas'). Foi secretario do Ateneo de Madrid, membro da Real Academia Galega e da RAE, así como presidente da Casa de Galicia en Madrid.
"A escasísima bibliografía sobre García Martí e o esquecemento que sufriu en todos os ámbitos, obrigounos a un exhaustivo labor de documentación, tanto a través do seu arquivo persoal (depositado na Casa Museo Valle-Inclán da Pobra do Caramiñal), a consulta do fondo documental do Museo do Pobo Galego, así como unha meticulosa revisión da prensa desde 1912 ata a súa morte en 1966", explica Arantxa Fontes. A presentación deste libro realizarase na tarde deste xoves na Fundación Torrente Ballester en Santiago de Compostela, coa presenza do alcalde, Martiño Noriega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.